FA Cup

Maten an se te final koup la (FA Cup) nan peyi Angletè, kote Manchester City te gen anfas yo Manchester United. Match sila a te jwe anba je ansyen antrenè Red Devils yo, Sir Alex Ferguson, ki li menm te ranpòte yon triple (Premier League, FA Cup ak Ligue des Champions) ak ekip Manchester United la nan lane 1999.

Manchester City pa te pran tan pou montre entansyon yo piske depi 13 segonn nan match la, Ilkay Gundogan, ki te kapitèn pou okazyon an, te ouvè eskò a sou yon demi vole deyò kare a ki siprann De Gea. Se konsa Manchester City te pran kontwòl match la jan tout moun te ka atann sa. Men nan anviwon 30èm minit yo, Manchester United te jwenn yon penalite gras ak yon balon ki te frape nan men Jack Grealish, e Bruno Fernandes pa t padone yo pou te egalize 1-1, yon eskò ki te rete jiska mitan an.

San okenn chanjman pou kòmanse dezyèm mitan an, se City ki te toujou ap mete presyon sou United. Sou yon koufran eksantre sou bò dwat la, De Bruyne soulve balon an pou Gundogan ki te lib nan tèt malèt la, san bri san kont, jwè alman an fè yon demi vole ki al fini kous li nan filè a pou twonpe De Gea yon dezyèm fwa nan 51èm minit match la. Se te dezyèm gòl demi vole li e chak a yon pye diferan. United pa t ka reponn malgre yo te rantre pepit ajanten an Alejandro Granacho, Wout Weghorst ak Scott McTominay nan match la. Okontrè, Gundogan te rive make yon twazyèm gòl yo te refize pou òje nan 72zyèm minit match la. Viktwa 2-1 nan final la pou jwè Pep Guardiola yo san fòse.

Gras ak viktwa sa nan koup la, sa fè Manchester City 2zyèm twofe yo sezon sa ak yon lòt final pou yo jwe nan Ligue des Champions an kont Inter samdi 10 Jen k ap vini an la. Nan ka yon viktwa se pral premye fwa Manchester City ap ranpòte Ligue des Champions an epi ap repete sa rival yo, Manchester United, te fè sa gen anviwon 24 lane. Konsa yo ap vini dezyèm ekip an Angletè ki ranpòte twa twofe sa yo sou menm sezon.

KÒMANTÈ

Denye atik yo