Premier League

A prè defèt yo (0-2) ayè samdi an fas Aston Villa nan Premier League la, dirijan Chelsea yo pa deside kontinye ak Graham Potter kote yo revoke l depi byen bonè jodi dimanch lan.

Klèb londonyen an k ap konnen yon sezon konplike nan chanpyona anglè a malgre tout depans yo fè nan dènye mèkato a, siyen revokasyon antrenè anglè an aprè anviwon 7 mwa depi l te rive sou ban ekip Chelsea an.

Nan yon kominike ki pibliye jodi dimanch lan, direksyon klèb londonyen an anonse separasyon yo avèk Graham Potter pou move rezilta. Annatandan rive yon lòt antrenè, Bruno Saltor ki te adjwen, pral asire enterim lan.

Avèk Graham Potter, Chelsea anrejistre youn nan pi move bilan li sou 20 dènye ane yo avèk 11 defèt, 8 match nil epi 12 viktwa sou 31 match li jwe sezon sa tout konpetisyon melanje.

Daprè Laprès nan peyi Angletè, ansyen antrenè Bayern Munich lan, Julian Nagelsmann, ta dwe pran tèt ekip Chelsea an nan jou k ap vini yo oubyen nan kòmansman sezon k ap vini an. Klèb londonyen an aktyèlman 11èm nan Premier League la.

KÒMANTÈ

Denye atik yo