Premier League

Manchester United ap finalize yon akò ki pral mennen Rúben Amorim nan tèt ekip la. Klèb la, selon dènye nouvèl yo, pare pou peye yon sòm 10 milyon € pou achte kontra Amorim ak ekip Sporting Portugal la.

Sporting ofisyèlman konfime Manchester United te voye yon demann pou pran manadjè aktyèl Sporting Portugal la, Rúben Amorim. Daprè enfòmasyon yo, Amorim pral rive Angletè demen ak twa nan antrenè li yo ki se: Carlos Fernandes, Adélio Cândido, ak Jorge Vital. Anplis, klèb anglè a ap diskite sou peryòd kilè Amorim ap kòmanse chita sou ban yo a.

Manchester United te deja pran angajman pou peye pou li e Amorim te deja bay akò li paske diskisyon ant klèb la ak reprezantan li yo te fèt pandan dènye trèv entènasyonal la. Se pandan peryòd sa a United te mete non li nan tèt lis kandida potansyèl yo pou ranplase Erik Ten Hag ki t ap mache sèlman sou move rezilta.

Amorim nan Sporting te fè yon bon rekò pandan sezon ki sot pase a ak kounye a tou. Sezon pase a, ekip li a te ranpòte chanpyona a ak 90 pwen nan 34 jounen, pandan yo te make 96 gòl ak sèlman pran 29 gòl.

Pou sezon 2024-2025 lan, Sporting montre yon dominasyon enpresyonan ak 9 viktwa nan 9 match nan chanpyona a, kote ekip la make 30 gòl ak sèlman 2 gòl yo pran. Ekip li a poko pèdi nan Lig Chanpyon yo, ak 7 pwen nan 3 match ak 1 gòl kont yo. An total, ekip la deja make 37 gòl nan 14 match, ak yon mwayèn 2.64 pwen pa match.

Rúben Amorim gen yon apwòch taktik byen defini ki mete l an evidans. Li itilize yon fòmasyon 1-3-4-3 ofansif, ak yon estrikti fleksib ki ka ale nan yon 4-2-5 pandan match la, kote gadyen an jwe ant defansè santral yo epi mete yon losanj ki pèmèt 5 jwè atake.

Ak sèlman 39 lane, Rúben Amorim deja genyen 6 gwo tit epi etabli l kòm youn nan pi gwo manadjè an ewòp. Manchester United espere avèk eksperyans sa a, ekip la ap kapab retounen an fòs. Fanatik yo ap tann ak kè kontan pou wè si Amorim ap kapab pote United tounen nan glwa li yo aprè Ten Hag te finn jete klèb sa nan labou.

KÒMANTÈ

Denye atik yo