Premier League

Nan dat 12 septanm pase a, federasyon anglè a te kòmanse yon ankèt sou milye tèren Tottenham lan, Rodrigo Bentancur (27 lane, 4 match nan Premier League la pou sezon an). Ankèt sa te louvri pou konnen si l koupab sou yon blag ki gen move gou pandan l t ap fè yon entèvyou.

Li te di "Son ? Ou vle yon mayo Son ? Oubyen pa kouzen l lan ? Antouka yo tout sanble", lè l t ap reponn yon jounalis ki te fè l apwòch nan moman li te prezan devan mikwo pou konferans pou laprès. Mayo ansyen jwè Juventus la te mande jounalis la si l vle a se pa atakan vedèt sidkoreyen Spurs yo, Heung-min Son (32 lane, 5 match e 2 gòl nan Premier League la pou sezon an).

Apre FA fin etidye sitiyasyon an, dirijan yo pran desizyon pou sanksyone Betancur pou 7 match akoz pawòl sa yo li te di kont koyekipye li a. Manm federasyon anglè yo konsidere sa l di yo kòm pawòl rasis.

Malgre Betancur te prezante eskiz li epi Son te aksepte, Irigweyen an gen yon sanksyon lou ki tonbe sou do l kote l ap gen pou l peye 120 000 ewo amann, ajoute sou 7 match li pa p jwe yo. Sanksyon sa se pou konpetisyon nan peyi Angletè yo, men li ap kapab kontinye jwe rankont Ligue Europa yo fas Roma ak Glasgow Rangers pou rès ane a.

KÒMANTÈ

Denye atik yo