Premier League

Yon non anpil moun pa konnen men ki klanmse bouch Guardiola ak City nan 24 minit sèlman.

João Pedro, jèn atakan brezilyen 23 lane, ede Brighton fè yon remontada sou Manchester City nan sèlman 24 minit li fè sou tèren an.

Match Brighton lan te kòmanse byen an favè Guardiola ak City, men yon kout kreyon Fabian Hurzeler, jèn antrenè swis 31 lane a fè, deranje sistèm jwèt Manchester City a epi chavire eskò match la nan avantaj ekip Brighton Albion lan.

Pou kòmanse match la, Hurzeler te kanpe ekip la nan yon sistèm 4-4-2. Sou sistèm sa, atakan nòvejyen an, Erling Haaland, te ouvri eskò a pou Cityzens yo nan 23èm minit. Mitan match la te fini konsa.

Rive nan dezyèm mitan an, Hurzeler pral chanje sistèm 4-4-2 a pou pase sou sistèm 4-3-3 a. Pou chanje sistèm sa, antrenè swis la pral fè kout kreyon majik lè li rantre jèn brezilyen an, João Pedro (atakan), nan plas Simon Adingra (mitan tèren) nan 66èm minit.

Se la Manchester City pral gen tout pwoblèm li. João Pedro pral egalize 12 minit apre li antre nan match (78èm minit). 5 minit aprè, menm ti landeng brezilyen sa pral bay pas gòl pou pèmèt Brighton bat City 2-1 nan American Express Community's Stadium lan (lakay Brighton).

Defèt sa vini kòm 4èm match youn apre lòt Manchester City pèdi. Nan 4 match sa yo, yo pran 10 gòl, yo bay sèlman 4.

Se dezyèm match Premier League youn dèyè lòt Manchester City pèdi. Sa ki se 69èm match Guardiola pèdi sou 489 match li dirije nan tèt Cityzens yo.

Malgre defèt la, Manchester City toujou jere dezyèm plas klasman an ak 23 pwen. Pou sezon sa, yo gentan pèdi 2 match epi yo fè 2 match nil. Sou 11 jounen yo fè 7 viktwa. Yo make 22 gòl yo pran 13.

KÒMANTÈ

Denye atik yo