Ekspatriye

AS Saint-Étienne fè yon viktwa enpòtan (2-0) kont EA Guingamp nan 10èm jounen Arkema Première Ligue la. Amandine Pierre-Louis, ki genyen 29 lane, te jwe tout match la epi te fè yon pas sou dezyèm gòl la. Viktwa sa a mete fen nan yon move seri pou ASSE.

AS Saint-Étienne t ap jwe anba gwo presyon aprè yo te pèdi de (2) match youn aprè lòt, yon defèt lou (11-0) kont Lyon epi yon lòt (2-0) kont Montpellier. Ekip la te oblije jwenn yon bon rezilta kont EA Guingamp, epi yo reponn apèl la avèk yon viktwa solid (2-0).

Grenadyè a ki genyen 29 lane, te pran wòl li pandan match sa. Li te rete sou teren an pandan 90 minit epi te patisipe nan kreye dezyèm gòl ekip li a. Nan 58èm minit, Pierre-Louis te fè yon bèl pas ki rive nan pye Sarah Cambot, ki pa rate okazyon an pou mete balon an nan filè, sou yon bèl frap deyò sifas la. Se premye fwa Amandine tounen desizif depi premye jounen chanpyona a, 21 septanm 2024, lè li te fè yon gòl epi yon pas kont Stade de Reims.

Sezon sa a, Pierre-Louis deja jwe 10 match nan Arkema Première Ligue la, ak 7 kòm titilè. Malgre kèk defèt ki te fè ekip la soufri, AS Saint-Étienne ka konte sou eksperyans li pou remonte nan klasman an.

Ak viktwa sa, AS Saint-Étienne monte 6èm nan klasman an ak 15 pwen. Ekip la genyen yon bilan 5 viktwa ak 5 defèt. Yo toujou genyen 5 pwen pou rekipere pou rive sou podyòm nan. Si Pierre-Louis kontinye montre bon pèfòmans, ASSE ka espere fini sezon an ak pi bon rezilta. Ekip la gen anpil travay ki rete pou fè, men viktwa kont Guingamp an montre yo sou bon wout pou reprann konfyans yo.

KÒMANTÈ

Dènye atik yo