Ekspatriye

Nan yon match difisil kont Paris FC nan Arkema Premier League la, Batcheba Louis te fè tout sa li kapab pou ede FC Fleury 91. Malgre sa, ekip la pèdi (1-4). Pèfòmans Batcheba Louis montre enpòtans li pou ekip la, pandan yo soulve kesyon sou chwa taktik antrenè a, Frédéric Biancalani.

Match la te fèt nan estad Robert Bobin an, kote Fleury 91 t ap resevwa Paris FC. Antrenè Frédéric Biancalani te fè yon chwa ki te mete tout moun nan gwo dout: li te kite Batcheba Louis sou ban an, malgre fòm ekselan li depi retou li soti nan trèv entènasyonal la ak seleksyon Ayiti a, kote li te make 3 gòl nan 3 match.

Fleury te kòmanse match la mal, e Paris FC te pran kontwòl tout bagay byen rapid. Clara Mateo te make yon triple (5yèm, 24yèm, 42yèm minit) ki te mete Fleury nan gwo difikilte. Se sèlman aprè 3èm gòl Parizyèn yo antrenè Biancalani te reyalize erè li. Nan 43èm minit la, li te fè de (2) chanjman : Dominika Kopińska ak Aïssatou Tounkara te kite teren an pou fè plas pou Inès Jaurena ak Batcheba Louis.

Antre Batcheba a te pote yon lòt dinamik nan match la. Li te nwi defans Paris FC a. Nan estatistik yo, gen de balon li te kadre. Nan 83èm minit, li te montre kalite li kòm atakan lè li te make yon bèl gòl ak tèt li sou yon sant Faustine Robert te fè. Malerezman, malgre tout efò li, Paris FC te make yon lòt gòl nan 89èm minit gras ak Mathilde Bourdieu ki te mete match la ak yon eskò (1-4).

Pèfòmans Batcheba Louis nan match sa a demontre wòl li kòm jwè ki pi enpòtan nan atak FC Fleury 91 lan. Li deja make 6 gòl ak bay 1 pas gòl nan 9 match, epi li se pi bon bitè ekip la nan chanpyona a. Men, antrenè Biancalani te fè yon gwo erè taktik lè li te kite li sou ban an nan kòmansman match la. Desizyon sa a te koute chè, sitou lè yo te fin pran 3 gòl nan premye mitan an epi Fleury pa t twò menasan pase sa.

Malgre defèt sa a, Fleury rete nan 6èm plas la ak 13 pwen, 4 pwen pou jwenn 4èm plas la, ki ta ba yo aksè nan faz pleyòf la. Si antrenè a aprann nan erè li yo epi kontinye fè konfyans nan Batcheba Louis, ekip la kapab toujou fè yon bon sezon.

KÒMANTÈ

Dènye atik yo