Ekspatriye

Nan 9èm jounen chanpyona Arkema Première Ligue la, AS Saint-Étienne (ASSE) ki gen konpatriyòt nou Amandine Pierre-Louis t ap resevwa Montpellier HSC Kethna Louis a, nan estad Salif Keita a. Malgre de (2) Grenadyè yo te kòmanse sou ban, yo te rive fè fas a fas sou teren an pandan match la. Se ekip Kethna Louis ki sòti ak yon viktwa (2-0) nan rankont sa, yon rezilta ki kenbe Montpellier byen wo nan klasman an.

Match la te kòmanse ak anpil aksyon depi premye segond yo. Montpellier ouvè eskò a depi 2èm minit gras ak yon gòl Lola Gstalter te make, pandan Ifeoma Onumonu te double avantaj la nan 43èm minit. Avèk rezilta sa a, AS Saint-Étienne kontinye ap soufri apre gwo defèt (11-0) yo te pran kont Olympique Lyonnais wikenn pase a.

Sou bò pèfòmans Grenadyè yo, Amandine Pierre-Louis te antre sou teren an nan 46èm minit nan plas Cindy Caputo. Li te eseye pote plis estabilite sou bò dwat defans ASSE a, men li pa t rive fè diferans fas ak yon ekip Montpellier ki te byen prepare.

Kethna Louis, li menm, te antre pi ta nan 83èm minit nan plas Lola Gstalter. Malgre ti tan li pase sou teren an, li te ede ranfòse defans ekip li a epi kenbe avantaj (2-0)la jiskaske match la fini.

Viktwa sa a mete Montpellier HSC nan 5èm pozisyon nan klasman an, pandan AS Saint-Étienne ap lite pou kenbe tèt yo nan 7èm plas la. Sou 6 dènye match yo, ASSE sèlman ranpòte yon sèl viktwa, yon sitiyasyon ki kontinye difisil pou ekip la.

Nan fas a fas sa a ant Grenadyè nou yo, se Kethna Louis ak ekip Montpellier ki soti ak yon bèl viktwa. Malgre ASSE ak Amandine Pierre-Louis te fè efò, pwoblèm ekip la kontinye ap jwe kont yo. De (2) Grenadyè yo kontinye reprezante Ayiti ak anpil fyète nan pi gwo lig foutbòl fanm an Ewòp la, e n ap tann plis nan men yo nan rès sezon an.

KÒMANTÈ

Dènye atik yo