Ekspatriye

Tout Grenadyè yo te prezan nan dènye jounen Arkema Première Ligue la pou lane 2024 la. Pèfòmans yo te melanje ant gwo efò pèsonèl, katon jòn, ekspilsyon, epi kèk gwo gòl. Ann revize ansanm sa yo fè pandan wikenn nan.

Nan vandredi, pou ouvri 11èm jounen an, Amandine Pierre-Louis te fè fas ak PSG ansanm ak AS Saint-Étienne. Malgre gwo efò l, ekip li an pèdi (0-3). Amandine te jwe tout 90 minit yo e li te pran yon katon jòn nan 93èm minit. Malgre de (2) bèl chout li te kadre, li pa t rive evite defèt ekip li an.

Yon lòt gwo chòk te fèt lè Kethna Louis ak Batcheba Louis te rankontre youn kont lòt nan match Montpellier kont FC Fleury 91. Viktwa a te pou Batcheba ak ekip li an, Fleury, ki te ranpòte l (0-1). Kethna, ki te jwe 80 minit pou Montpellier, li te pran de (2) katon jòn (59’ ak 80’), ki lakoz li te ekspilse. Aprè match la, Kethna te pataje yon mesaj fò sou Facebook li, kote li di: "Lavi se tankou yon tanpèt sou lanmè, gen monte desann, men sa ki enpòtan, se konnen kijan pou w kenbe direksyon an." Sou lòt bò, Batcheba te jwe tout match la epi li te rive fè yon chout kadre.

Yon lòt match ki te atire atansyon, se te rankont ant Roseline Eloissaint ak Melchie Dumornay. Lyon, ekip Melchie a, te bat Nantes FC (5-1), kote Melchie te make 2 bèl gòl, epi fè senk (5) chout kadre nan 70 minit. Roseline, ki te kòmanse match la pou ekip li a, e te jwe tout 90 minit yo, men li pa t ka anpeche gwo defèt sa a.

Ak jounen sa a, Arkema Première Ligue fèmen pòt li pou lane 2024 la. Lig la ap reprann 7 ak 8 janvye 2025, kote n ap gen gwo afwontman tankou Fleury ekip Batcheba a kont PSG, Saint-Étienne ki genyen Amandine kont Stade de Reims, Lyon kont Dijon, ak Nantes kont Guingamp. Sepandan, Kethna Louis p ap kapab patisipe nan pwochen match Montpellier a akoz katon wouj li an.

Grenadyè yo ap genyen tan pou prepare yo pandan trèv la pou yo retounen pi fò nan nouvèl ane a.

KÒMANTÈ

Dènye atik yo