Ekspatriye

Dimanch 17 novanm 2024 ki sot pase a, Madam Maxiana Tanis, grann grenadye entènasyonal ayisyen an, Martin Expérience, mouri nan laj 107 lane. Madam Tanis, ki te yon poto mitan nan fanmi li, kite dèyè yon eritaj rich nan istwa ak valè ki pral kontinye enspire jenerasyon k ap vini yo.

Nan moman doulè sa a, fanmi Expérience, ki gen ladan Martin, papa li Roberas “Bob” Expérience, frè li Guillaume ak sè li Chloé, ap travèse yon peryòd difisil, men yo ap resevwa anpil sipò moral nan men zanmi yo ak moun ki fè pati vi yo.

Malgre doulè ki te frape li, Martin Expérience te chwazi montre detèminasyon ak fòs pandan match Ayiti kont Pòtoriko a nan kad Lig Nasyon yo, ki te jwe 18 novanm nan demen lanmò a. Li te fè yon pas gòl pou Frantzdy Pierrot ki make twazyèm gòl viktwa Ayiti a (3-0). Se te yon aksyon espesyal, ki reprezante yon omaj senbolik pou granmè li ki te tou pre kè li.

Martin Expérience fèt 9 mas 1999 nan kominn Châteaubriant, nan peyi Lafrans. Li te kòmanse jwe pou seleksyon Ayiti an 2021. Depi premye match li, li te enpresyone kòm yon latéral goch ki gen bon teknik ak anpil enèji sou teren an. Jiskaprezan, li deja jwe 11 match pou AS Nancy-Lorraine nan sezon sa, kote li kontinye fè bèl pwogrè nan karyè li.

Antèman Madam Maxiana Tanis ap fèt samdi 30 novanm 2024 k ap vini nan komin Marchand-Dessalines, kote fanmi, zanmi ak moun ki te renmen li ap rasanble pou rann dènye omaj la. Madam Tanis te yon fanm ki te viv yon lavi plen lanmou, eksperyans ak fòs, e memwa li ap kontinye viv nan kè tout moun ki te konnen li.

Se pou nanm li repoze anpè, epi pou fòs li kontinye gide fanmi li nan moman sa a.

KÒMANTÈ

Dènye atik yo