Ekspatriye

Pandan wikenn nan, Arkema Première Ligue la te rive nan 11èm jounen li, sa ki mete yon bout nan faz ale chanpyona a. Ayiti ki genyen 5 reprezantan nan lakou peyi Lafrans, ann wè ki bilan Grenadyè nou yo nan premye pati sa pou sezon 2024-2025 lan.

Nou kòmanse ak Melchie Daëlle Dumornay, youn nan pi gwo espwa Ayiti genyen, ki kontinye fè mirak nan Arkema Première Ligue la. Jwez natif natal Mibalè a se yon poto mitan nan ekip Olympique Lyonnais a ki klase an premye nan chanpyona a. Corventina, jan yo konn rele l la, te patisipe nan 9 match, 8 kòm titilè, e li make 10 gòl pandan l bay 2 pas gòl. Li klase 2èm pi bon bitè chanpyona a, sa ki mete l nan yon pozisyon pou kontinye briye nan faz retou a.

Pou Batcheba Louis, li ap fè yon sezon solid ak FC Fleury 91, ki klase 5èm nan chanpyona a ak 17 pwen (5 viktwa, 2 nil, 4 defèt). Grenadyè a te jwe tout 11 match yo, 7 kòm titilè, e li make 5 gòl. Prezans li nan atak ekip la montre enpòtans li kòm youn nan jwè kle yo.

Kethna Louis ap defann koulè Montpellier HSC ki klase 6èm nan chanpyona a ak 16 pwen (5 viktwa, 1 nil, 5 defèt). Nan nivo pèsonèl, Louis te patisipe nan 10 match, 7 kòm titilè, kote li make 1 gòl epi bay 1 pas gòl. Li rete yon eleman enpòtan nan koulwa goch defans ekip sa.

Pandan tan sa, Amandine Pierre-Louis k ap jwe nan AS Saint-Étienne ki klase 7èm nan Arkema Première Ligue la ak 15 pwen (5 viktwa, 6 defèt). Jwez ayisyèn nan patisipe nan tout 11 match yo, 8 kòm titilè. Li kontribye ak 1 gòl epi 2 pas gòl.

Pou fini, nou gen Roseline Eloissaint, ki ap jwe pou Nantes FC, k ap reprann fòm li aprè yon lane difisil akòz blesi. Nantes FC klase 8èm ak 14 pwen (4 viktwa, 2 nil, 5 defèt). Eloissaint te patisipe nan 6 match, 3 kòm titilè, kote li make 1 gòl. Malgre kòmansman sezon difisil li a, li gen potansyèl pou fè pi byen nan faz retou a.

Premye pati chanpyona Arkema Première Ligue la montre angajman ak kapasite jwez ayisyèn yo nan nivo ki pi wo nan koze foutbòl fanm lan. Chak Grenadyè ap bay pi bon yo menm nan ekip yo, e yo reprezante Ayiti avèk fyète. Nou swete yo kontinye briye pandan faz retou chanpyona a pou sezon 2024-2025 lan.

KÒMANTÈ

Dènye atik yo