Ekspatriye

Nan chanpyona sa gen yon fòma kote 16 ekip ap gen pou rankontre yon sèl fwa nan premye faz la. Premye nan klasman an ap kalifye dirèkteman pou Copa Libertadores epi pou final chanpyona a k ap bay ekip chanpyon an. Si nan de faz yo se yon sèl venkè li ye, l ap tou senpleman chanpyon san okenn dout !

Nan premye faz la se ekip Independiente del Valle a kite fini nan tèt klasman an avèk 34 pwen, devan Club Deportivo El Nacional avèk 30 pwen, epi LDU Quito te fini an twazyèm avèk 26 pwen. Eben, sa te lakòz ekip ki fini devan an kalifye pou final la kote l ap tann ekip k ap fini nan dezyèm faz chanpyona a !

Pou dezyèm faz chanpyona a, se ekip LDU Quito ki genyen entènasyonal ayisyen an, Ricardo Adé, k ap jwe defansè santral ladan l ki fini nan premye plas la avèk 36 pwen, devan Barcelona Sporting Club ki limenm fini ak 32 pwen, e sa te lakòz nou konnen de (2) finalis yo !

Ebyen de (2) ekip ki ta pral fè final yo se te Independiente del Valle kont LDU Quito, nan yon fòmil match ale retou. Premye match la te jwe samdi pase kote LDU Quito te bat Independiente del Valle (3-0), gras avèk A. Arce (2 gòl) ak G. Villamíl (1 gòl) kite pèmèt klèb yo an genyen match ale a.

Match retou an jwe samdi 14 desanm lan lakay Independiente del Valle. Yon match yo bat LDU Quito (1-0) gras avèk L. Zárate nan 90+6’, ki pa t vrèman sifi koz ant de eskò yo se ekip LDU Quito a ki genyen (3-1).

Yon gwo chanpyon pou LDU Quito ki genyen jwè seleksyon ayisyèn nou an ladan l. Yo ranpòte 13èm chanpyona Ekwatè nan istwa yo aprè 1969, 1974, 1975, 1990, 1998, 1999, 2003, 2005 A, 2007, 2010, 2018, 2023 ak sezon 2024 la kote yo genyen l avèk briyo !

Se pou dezyèm fwa youn kole ak lòt Ricardo Adé pran chanpyona sa avèk LDU Quito. Aprè 2023, se tou pa 2024 kote li chanpyon ak klèb sa li te vini ladan n menm ane 2023 sa !

Ricardo Adé ki fini pi bon jwè final la, entènasyonal Ayisyen an jwenn rekonpans sa gras avèk bèl pèfòmans li reyalize nan seri sa !

KÒMANTÈ

Dènye atik yo