Ekspatriye

Roseline Eloissaint, atakan Ayisyèn nan, make premye gòl li nan sezon an nan Arkema Première Ligue la jodi mèkredi a. Gòl sa a te pèmèt FC Nantes ranpòte yon viktwa enpòtan (2-1) kont RC Strasbourg, pandan yon match an reta pou 9yèm jounen chanpyona a. Viktwa sa a make yon gwo retou pou jwèz la ki sot pase plis pase yon ane deyò teren akòz blese.

Roseline Eloissaint pa t kòmanse match la, men li te antre nan 64yèm minit nan plas Danielle Marcano. Se te yon chanjman ki fè diferans lan, paske 20 minit apre, atakan Ayisyèn nan make gòl viktwa a kont ansyen klèb li, RC Strasbourg.

Se premye gòl li nan sezon an, aprè senk (5) match li jwe nan chanpyona a. Gòl sa a pa sèlman mete fen nan yon seri kat (4) match san viktwa pou FC Nantes (de (2) nil, de (2) defèt), men li montre tou Roseline ap reprann fòm li piti piti apre yon ane difisil san l pa t jwe.

Apre viktwa sa a, FC Nantes ap prepare pou yon gwo rankont kont Olympique Lyonnais jou ki ap 14 desanm nan. Match sa a ap espesyal, paske Roseline ap rankontre yon lòt zetwal Ayisyèn, Melchie Dumornay, ki jwe pou ekip advès la.

Avèk gòl sa a, Roseline Eloissaint montre li retounen ak fòs ak detèminasyon. FC Nantes gen anpil esperans nan li pandan sezon sa a, e li deja montre li kapab fè diferans lan nan moman enpòtan yo.

KÒMANTÈ

Dènye atik yo