Ekspatriye

Olympique Lyonnais (OL) te deplase nan estad Océane pou yo jwe kont Le Havre AC nan 9èm jounen Arkema Première Ligue la. San anpil difikilte, Fenotte yo ranpòte yon viktwa (3-0) gras ak gòl Amel Majri, Eugénie Le Sommer epi Vicki Becho te make. Avèk rezilta sa a, OL kontinye kenbe tèt klasman an, epi yo montre li se yon ekip ki difisil pou bat nan moman sa a.

Lyon kontinye ap ekri istwa nan chanpyona fanm lan. Avèk 8 viktwa ak 1 match nil sou 9 match, yo deja kolekte 25 pwen epi yo rete nan premye plas klasman an. Se pa sèlman nan chanpyona lokal la ekip sa a enpresyone moun, men tou nan Ligue des Champions an tou kote yo jwe 4 match epi ranpòte tout san okenn pwoblèm. Ekip la montre li gen yon ekip ki pa sèlman fò, men ki konstan tou nan pèfòmans li yo.

Yon bagay ki klè anndan ekip sa, se kantite talan ak kad yo genyen. Pou match kont Le Havre la, Grenadyè a, Melchie Daëlle Dumornay te fè deplasman ak ekip la, men antrenè a, Joe Montemurro, te deside kite l sou ban pandan tout match la. Desizyon sa etone anpil moun, men sa montre nivo ekip Lyon an ki ka pèmèt yo kite yon jwè tankou Dumornay sou ban san yo pa pèdi fòs yo sou tèren an.

Ekip la gen anpil jwè ki gen gwo potansyèl ak eksperyans tankou Wendie Renard, Kadidiatou Diani, Eugénie Le Sommer, yon lejand nan foutbòl fanm nan, ak jèn talan tankou Vicki Becho (21 an), Selma Bacha (24 an) ak Sofie Svava (24 an).

Ak yon melanj jèn talan ak eksperyans solid, OL kontinye domine tout konpetisyon kote yo patisipe. Viktwa kont Le Havre a se yon lòt egzanp sou pouvwa Fenetto yo. Ekip la pa sèlman genyen, men yo fè sa ak estil epi efikasite. Ak twa bitè diferan, Lyon te montre fòs kolektif yo epi fè wè aklè poukisa yo se youn nan pi bon ekip foutbòl fanm nan mond lan.

KÒMANTÈ

Dènye atik yo