Lòt Koze

Violette AC, Aigle Noir AC, St Louis G Académie ak Racing CH lanse yon nouvo inisyativ pou fèmen ane 2024 la ak bèl foutbòl. Yon tounwa espesyal yo rele "COUPE NOSTALGIE" ap dewoule sòti 11 pou rive 22 desanm, avèk patisipasyon gwo ekip istorik lokal yo.

Se yon atmosfè kiltirèl ak espòtif ki pral anbrase tounwa sa a, nan yon moman foutbòl preske mouri Ayiti. Gen kèk gwo pèsonalite nan foutbòl ayisyen ki pral gen opòtinite teste fòmasyon yo pou fen ane a. Evènman sa a mete klèb istorik tankou Violette Athletic Club (dènye klèb ayisyen ki te pran kouwòn chanpyon Karayib la), Aigle Noir AC, St Louis Gonzague Académie ak Racing CH ansanm pou yon bèl fèstival foutbòl.

Aktivite sa a ap dewoule nan Parc Sportif Thomassin ak Parc St Thérèse, kote yo espere atire fanatik ak amatè foutbòl k ap chèche bon moman nan fen ane a. Match ouvèti a, ki gen anpil atansyon, ap fèt jodi mèkredi 11 desanm 2024 la nan Parc Sportif Thomassin, kote Violette AC ap fè fas ak St Louis G Académie nan yon match ki ap kòmanse a 3:00 PM.

Kalendriye ofisyèl la :

11 desanm 2024 : Violette AC vs St Louis G (3:00 PM)

12 desanm 2024 : Aigle Noir AC vs Racing CH (3:00 PM)

14 desanm 2024 : St Louis G vs Aigle Noir AC (3:00 PM)

15 desanm 2024 : Violette AC vs Racing CH (3:00 PM)

18 desanm 2024 : Racing CH vs St Louis G (3:00 PM)

19 desanm 2024 : Violette AC vs Aigle Noir AC (3:00 PM)

Tounwa sa reprezante yon gwo opòtinite pou retwouve bèl kilti foutbòl ayisyen an pandan n ap raple istwa rich ekip sa yo. Yon bagay sèten, fanatik yo ap gen anpil rezon pou yo viv yon bèl fen ane avèk Coupe Nostalgie.

KÒMANTÈ

Denye atik yo