Lòt Koze

Depi fondasyon l an 2014, Real Hope FA, ki baze nan vil Okap, ap fè pwogrè remakab nan foutbòl ayisyen an. Sòti nan premye match li yo nan lig lokal yo rive nan kalifikasyon li pou Lig Chanpyon Concacaf la, klèb la demontre yon detèminasyon ak yon pwofesyonalis ki montre kapasite li pou reprezante Ayiti avèk fyète.

Nan dat 14 mas 2014, yon gwoup pasyone nan vil Okap te pran desizyon pou kreye Real Hope FA. Yo te mete ansanm ak objektif pou bati yon ekip ki t ap kapab fè konpetisyon ak pi gwo klèb nan peyi a, sitou de (2) sa Okap yo. Nan premye ane yo, klèb la te montre kapasite li pou grandi rapidman, e an 2015, li te monte nan 2èm divizyon ayisyèn (D2).

Nan lane 2016, Real Hope FA te pran yon lòt etap enpòtan nan istwa li. Aptre yon sezon difisil nan D2, yo te monte nan 1e divizyon ayisyèn (D1). Depi moman sa, klèb la pa janm gade dèyè. An 2017, sèlman yon lane aprè monte yo nan D1, Real Hope FA te vin chanpyon chanpyona nasyonal la, yon reyalizasyon eksepsyonèl pou yon klèb ki te toujou ap grandi. Tit sa a te louvri pòt pou klèb la patisipe nan CFU Championship an 2018, kote yo te reprezante Ayiti nan nivo rejyonal la.

Nan lane 2024, Real Hope FA te reprann tit chanpyon D1 an, ki montre klèb la rete yon fòs enpòtan nan foutbòl ayisyèn nan. Yo te fè plis pase sa lè yo te fini 3èm nan Concacaf Caribbean Cup la toujou nan menm ane a, yon lòt gwo etap pou montre konpetans yo nan konpetisyon entènasyonal yo. Pou sezon 2025 la, Real Hope FA deja fè istwa kòm youn nan klèb ayisyen yo ki pral patisipe nan Lig Chanpyon Concacaf, kote yo pral jwe kont gwo ekip tankou Cruz Azul nan mwa fevriye k ap vini la.

Yo abitye pran twofe andeyò peyi a, nan lane 2017, Real Hope FA te patisipe nan yon tounwa espesyal nan Repiblik Dominikèn kote yo te fè fas ak ekip tankou Atlantico FC ak Cibao FC. Malgre yo te pèdi premye match la kont Atlantico FC (1-2), yo te retounen fò e kale Cibao FC (2-1) pou rive nan final la. Nan yon final sere, ki te dewoule nan Santiago de los Caballeros, yon gòl nan dènye minit jèn jwè Naldory Joseph Xavier te pèmèt Real Hope FA ranpòte tounwa a epi pran revanj sou Atlantico FC. Viktwa sa a te montre kapasite klèb la pou reprezante foutbòl ayisyen avèk onè nan nivo rejyonal la.

Malgre kriz ekonomik ak enstabilite politik ki kontinye frape Ayiti, Real Hope FA ap chèche bay foutbòl ayisyen an yon vizyon nouvo. Klèb la montre ak detèminasyon epi yon bon estrikti, foutbòl ayisyen an ka rive nan pi gwo nivo entènasyonal yo. Kalifikasyon yo pou Lig Chanpyon Concacaf se pa sèlman yon reyalizasyon pou yo, men tou yon sous fyète pou tout Ayiti.

Real Hope FA reprezante plis pase yon ekip foutbòl. Li se yon senbòl espwa, detèminasyon, ak pwogrè. Depi yon kòmansman sòti tou ba pou rive anlè la, klèb sa a ap kontinye fè istwa epi montre avni foutbòl ayisyen kapab klere, menm nan moman ki pi difisil yo.

KÒMANTÈ

Denye atik yo