Lòt Koze

Violette AC te fè yon gwo retou nan dezyèm mitan an pou ranpòte yon viktwa (3-1) kont Aigle Noir jodi 17 desanm nan, nan Parc Sainte-Thérèse. Malgre absans kèk jwè kle tankou Elyvens Dejean ak Jerry Anis, ekip Vye Tig yo montre fòs kolektif yo pou sòti ak tout pwen yo.

Nan kad "Coupe Nostalgie" oubyen "Coupe des Doyens" an, Violette AC t ap jwe twazyèm ak dènye match yo nan faz gwoup la kont Aigle Noir du Bel-Air. Yon rankont enpòtan pou tou de ekip yo ki t ap chache yon rezilta pozitif. Malgre Violette te fè plizyè chanjman nan ekip yo, Aigle Noir te montre yon gwo nivo pandan tout premye 45 minit yo.

Nan premye mitan an, Aigle Noir te domine jwèt la ak anpil presyon sou defans Violette la. Yo te kreye plizyè opòtinite, men yo pa t rive fè diferans lan. Violette, sou bò pa yo, t ap chèche jwenn rit yo san reyèlman mete Aigle Noir an difikilte. Premye mitan an te fini san gòl, eskò a te toujou rete (0-0).

Dezyèm mitan an te kòmanse ak menm entansite a. Aigle Noir, byen òganize nan mitan tèren yo, te ouvri eskò a nan 61èm minit la gras ak Cesar Kemsly, ki te pwofite yon rekiperasyon yon boul nan mitan tèren yo pou mete ekip Bèlè a devan. Men, Violette pa t pran tan pou reponn.

Nan 71èm minit la, Molensky Cima te remete Vye Tig yo nan match la ak yon gòl pou jwenn egalizasyon. Gòl sa a te pote yon gwo chanjman nan dinamik match la ki bay Violette plis konfyans pou kontinye mete presyon sou defans Aigle Noir la. Sèlman kèk minit aprè, nan 77èm minit la, Louis Jean Clifford te ajoute yon dezyèm gòl ki te mete Violette devan pou premye fwa nan rankont la. Nan dènye moman yo, Molensky Cima te finalize travay ekip la ak yon lòt gòl nan 90+5 minit, konfime viktwa (3-1) ekip Vye Tig yo.

Avèk viktwa sa, Violette AC fini faz gwoup la avèk 9/9, montre detèminasyon ak kalifikasyon yo pou etap k ap vini an. Malgre bon efò Aigle Noir, ekip Bel-Air la oblije aksepte defèt la pandan fanatik Violette yo kontinye selebre bèl pèfòmans ekip yo.

KÒMANTÈ

Denye atik yo