Lòt Koze

Nan dezyèm jounen Coupe Nostalgie a, ekip Aigle Noir pa rive fè diferans fas a jèn ekip Akademi Saint-Louis de Gonzague la. Match la, ki te fèt ayè samdi an, nan Parc Sainte-Thérèse, fini (1-0) an favè ekip Saint-Louis an.

Aigle Noir, ekip ki genyen anpil istwa nan foutbòl ayisyen an te genyen anpil presyon pou fè yon bèl premye parèt nan Coupe Nostalgie a. Men, jèn ekip Saint-Louis Gonzague Akademi an, ki te sòti sou yon gwo defèt (6-1) kont Violette AC nan premye jounen an, te parèt pi òganize, pi motive, e pi efikas nan rankont sa a.

Match la te kòmanse ak anpil entansite, kote tou de (2) ekip yo te eseye pran kontwòl boul la nan mitan tèren an. Saint-Louis te montre plis disiplin taktik, pandan Aigle Noir te pèdi anpil pas enpòtan. Nan 13èm minit, Felisme Rony, aryè gòch Saint-Louis an frape yon koufran ki te ki ta pral pèmèt yo mennen nan match foutbòl la. Malgre Lègnwa eseye pandan dezyèm mitan an, yo pa t rive jwenn egalizasyon an.

Aigle Noir, ki te gen yon match pwograme kont Racing Club Haïtien pandan premye jounen an, pa t jwe paske rankont sa a te ranvwaye pou mèkredi 18 desanm akòz kèk ti pwoblèm nan kan Racing lan.

Ak viktwa sa a, Akademi Saint-Louis de Gonzague reyalize premye pwen yo nan konpetisyon an e montre kapasite yo pou yo fè sipriz fas ak ekip ki pi fò ke yo sou papye. Pou Aigle Noir, defèt sa a vle di genyen anpil travay ki dwe fèt pou retounen sou wout la. Match yo kont Racing Club Haïtien an ap yon gwo tès pou wè si ekip la ka remonte moral epi retabli konfyans nan rès konpetisyon an.

KÒMANTÈ

Denye atik yo