AKÈY AYITI Lòt Koze

Lòt Koze

Racing Club Haïtien kont Violette AC: Yon klasik ki pou fè nou sonje bon tan ki te genyen lontan yo

15 desanm 2024 Steve Pierre 281

Klasik foutbòl ayisyen an retounen aprè plis pase twa zan san konfwontasyon. Jodi dimanch 15 desanm nan, Parc Sainte-Thérèse nan Petyonvil ap tounen tèren batay kote Vye Lyon (Racing Club Haïtien) ap kwaze ak Vye Tig (Violette AC) nan kad tounwa "Coupe Nostalgie" a. Yon rankont ki gen tout gou dèbi nasyonal la e ki pral fè nou sonje bèl tan lontan nan estad Sylvio Cator. Randevou a fikse pou 3è nan laprèmidi.

Racing Club Haïtien ak Violette AC pa de (2) senp ekip konsa konsa. Yo chak se yon wòch nan fondasyon foutbòl ayisyen an. Racing, ki te ranpòte Lig Chanpyon Concacaf lan an 1963, ak Violette, chanpyon Concacaf 1984 epi Caribbean Club Championship an 2022, toujou genyen yon listwa rich ki fè rankont yo tounen gwo evènman pou fanatik yo.

Pandan plis pase twa zan, sitiyasyon peyi a te anpeche nou jwi dèbi istorik sa. Men, jodi a, nou jwenn chans pou nou reviv rivalite sa a nan yon lòt kontèks. Coupe Nostalgie ou Coupe des Doyens ap sèvi kòm platfòm pou fanatik yo retounen pran gou bèl moman sa yo.

VAC te deja frape fò pandan premye sòti yo nan tounwa a lè yo te demoli Saint-Louis de Gonzague Akademi (6-1). Vye Tig yo montre yo toujou nan bon jan fòm e yo pare pou yo kenbe sipremasi yo nan tounwa a.

Sou lòt bò, Racing Club Haïtien poko montre fòs yo nan tounwa a, paske yo te gen kèk ti pwoblèm ki te anpeche yo jwe premye match yo. Match sa a reprogramme pou mèkredi 18 desanm k ap vini la, a 3è nan laprèmidi. Fanatik yo ap tann pou wè ki estrateji Vye Lyon yo ap pote nan derby sa a.

Derby sa pa jis yon match, li pote yon kokennchenn emosyon ki depase foutbòl. Se yon moman kote tout jenerasyon fanatik yo ka reyini pou yo selebre kilti foutbòl ayisyen an. Derby sa toujou gen yon gou espesyal, menm jan sa te ye lè foul moun te konn desann Sylvio Cator pou viv moman rivalite ant Violette ak Racing lè chanpyona nasyonal la t ap frape.

Dimanch 15 desanm 2024, Parc Sainte-Thérèse. 3è laprèmidi. Vye Tig kont Vye Lyon. Se pa sèlman yon match, men yon paj nan listwa foutbòl ayisyen k ap kontinye ekri jodi a. Èske Violette ap kenbe momenntòm yo? Oswa èske Racing pral fè tout fanatik yo sonje fòs lyon yo? Yon sèl fason pou w jwenn repons lan : Se prezan pita.