Lòt Koze

Real Hope FA fè yon gwo pa nan direksyon pou yon plas nan Concacaf Champions Cup 2025 avèk yon viktwa (1-0) kont Moca FC aswè a nan premye match pou twazyèm plas Concacaf Caribbean Cup 2024. Gòl byen bonè Stanley Joseph te make a te sifi pou asire ekip ayisyen an yon avantaj enpòtan malgre difikilte yo pandan match la.

Stanley Joseph te fè diferans lan depi nan 8èm minit, e te tou pwofite make premye gòl li nan konpetisyon an. Real Hope te kenbe kontwòl pandan yon bon pati nan premye mitan an, malgre kèk presyon Moca FC t ap mete. Fòk nou di tou, Clifford Thomas k ap jwe nan klèb dominiken an te titilè e jwe tout match la.

Sepandan, sitiyasyon an te vin pi difisil nan fen premye mitan an. Watz Leazard, ki te kòmanse kòm titilè, te ranplase pa Steeve Mondestin nan 41èm minit. Malerezman, Mondestin te resevwa yon katon wouj dirèk nan 45èm minit la, ki te kite Real Hope ak 10 jwè pou tout rès match la.

Malgre dezavantaj sa a, ekip ayisyen an te montre fòs defansiv li, avèk Gooly Elien nan bon fòm nan kan ekip la, anpeche nenpòt tantativ egalizasyon bò kote Moca FC.

Viktwa sa mete Real Hope nan yon bon pozisyon pou asire yon plas nan CCC 2025 lan. Ekip la pral fè yon dènye efò nan match retou a, ki ap fèt madi 3 desanm 2024 k ap vini la nan estad Moca 85 nan Repiblik Dominikèn, a 4:30 PM.

Malgre avantaj 1-0 yo genyen, Real Hope dwe prepare pou yon batay difisil kont yon ekip Moca ki pral fè tout efò pou tounen lakay li avèk yon rezilta pozitif.

KÒMANTÈ

Denye atik yo