Premye Divizyon

Atakan venezelyen an, Edgar Rafael Castellanos Ruiz, ki genyen 29 lane, pa yon jwè Real Hope Football Academy ankò. Klèb la deside voye l tounen Venezyela aprè premye tou nan Concacaf Caribbean Cup la.

Pou ranfòse atak yo a pandan yon pral jwe yon konpetisyon entènasyonal, RHFA te fè vini nan ekip la Edgar Castellanos Ruiz ak yon wotè 1.84 m, jwè venezyelyen an te kapab vini fè ladiferans. Sepandan, pèfòmans li pa t satisfè responsab ak pèsonèl teknik klèb la, ki montre yon dezakò ak rezilta li yo. Jwè a te rive nan Real Hope FA 1ye jiyè 2024 la, men, malgre eksperyans li nan plizyè klèb tankou Trujillanos FC, Gran Valencia, ak Zulia FC, li pa t kapab enpresyone nan konpetisyon an. Li jwe 211 minit pandan 4 match nan Carribean Cup la, li pa ni make, ni bay pas gòl okontrè li te pran yon katon jòn nan premye match la kont Police FC.

Se pou n di tou, ofisyèlman, Real Hope FA pa sòti yon nòt sou dosye sa, men anpil konfrè nan laprès sitou nan vil Okap eksplike dirijan yo te pran desizyon sa a aprè yon evalyasyon rapid sou kontribisyon jwè a pandan premye tou a.

Pou fini, Real ap genyen pou jwe kont Cibao FC nan kad demi final Concacaf Caribbean Cup la, mèkredi 23 oktòb 2024, k ap vini la. Match sa a se yon faz eliminatwa ale-retou, kote chak ekip ap chache jwenn avantaj pou avanse nan final konpetisyon an.

KÒMANTÈ

Denye atik yo