Seleksyon Nasyonal

Samdi 23 mas 2024, seleksyon nasyonal ayisyèn lan jwe premye match zanmitay li pou lane an fas Giyàn Fransèz kote l fè match nil (1-1) an deplasman. Sa ki make rankont sa, se sitou nan kondisyon match sa jwe an.

Si anpil moun t ap tann avèk anpil kiryozite premye pèfòmans Sébastien Migné kòm seleksyonè nasyonal ansanm ak nouvo ranfò ki vini yo, match sa pase kòm yon gwo desepsyon pou seleksyon nasyonal la ak sipòtè ayisyen yo akoz move kalite tèren estad Edmard Lama a.

Depi 2020, seleksyon ayisyèn nou yo pa otorize resevwa match an Ayiti akoz degradasyon kondisyon sekirite yo kote chak jou pi plis se moun k ap peri akoz vyolans. Nan kapital pwovens fransè Giyàn, Kayèn, seleksyon ayisyèn senyò an jwe sou yon tèren ki pa t nan kondisyon pou resevwa menm yon match amatè.

Si prèske tout moun dakò Ayiti poko pare pou resevwa match entènasyonal sou divès enfrastrikti espòtif nou yo akoz vyolans lan, anpil moun kwè tou kalite tèren nou yo siperyè anpil lòt ekip nasyonal nou yo jwe dènye lane sa yo, si n site kèk tèren FHF la te konn abitye lwe nan peyi Repiblik dominikèn.

Yon match nou dwe bliye vit, pa sèlman akoz rezilta nil 1-1 an, men pou tout lòt bagay ki pase deyò tèren yo, mete sou jwè ki te gentan blese depi byen bonè akoz move kalite tèren estad Edmard Lama a. Daprè enfòmasyon ki rive nan redaksyon an, ekipman seleksyon nasyonal la te rive byen ta nan aswè anvan match la, match la pa t ka jwe nan lè l te sipoze jwe an akoz blokis ki te genyen sou wout la, pou n site sa yo sèlman.

N ap raple, seleksyon ayisyèn lan ap gen pou kòmanse eliminatwa mondyal 2026 la nan mwa jen k ap vini la. Si kondisyon yo rete konsa, san dout ekip nasyonal la pral kontinye resevwa match entènasyonal yo nan lòt peyi. Kesyon n ap poze, èske n ap jwe sou kalite tèren sa yo ankò?

KÒMANTÈ

Denye atik yo