Seleksyon Nasyonal

Seleksyon nasyonal Ayiti reyalize yon pakou san fot nan Lig Nasyon CONCACAF 2024-2025. Nan gwoup C a, Ayiti fini an premye ak yon seri viktwa ki make listwa. Rezilta sa yo pèmèt Ayiti retounen nan Lig A epi konfime patisipasyon li nan Gold Cup 2025 lan.

Nan Lig B a, seleksyon Ayiti te plase nan Gwoup C ansanm ak Pòtoriko, Awouba epi Senmaten. Ekip la te montre yon siperyorite nan tout match yo, li fè 6 viktwa nan menm kantite rankont lan. Ayiti make yon total 29 gòl pandan li pran sèlman 5. Sa montre yon balans efikas ant atak ak defans lan.

Jwè yo te jwe yon wòl kle nan siksè ekip la. Duckens Nazon te briye ak 9 gòl, k ap fè l pi bon bitè seleksyon an nan konpetisyon an. Frantzdy Pierrot fè 7 gòl, te montre yon kapasite pou fini aksyon yo.

Plizyè lòt jwè te sipòte atak la ak kontribisyon enpòtan yo. Deedson Louicius ak Christopher Attys make yo chak 3 gòl, pandan Danley Jean Jacques ak Mikaël Cantave kontribye ak 2 gòl. Mondy Prunier, Duke Lacroix, ak Fafa Picault te ajoute chak 1 gòl nan total ekip la.

Avèk rezilta sa yo, Ayiti fini an premye nan gwoup la, sa ki ofri l yon tikè pou retounen nan Lig A Lig Nasyon an. Anplis, premye plas nan gwoup la pèmèt Ayiti kalifye dirèkteman pou Gold Cup 2025, ki pral make 10èm patisipasyon seleksyon an nan konpetisyon sa a depi nouvo fòma a an 1991.

Match yo an detay :

• Ayiti bat Pòtoriko 2 fwa (4-1/ 3-0)

• Ayiti bat Awouba 2 fwa (3-1/ 5-3)

• Ayiti bat Sen Maten 2 fwa (6-0/ 8-0)

Seleksyon Ayiti fè yon bèl etap nan Lig Nasyon an, men defi yo poko fini. Lig A pral mande plis disiplin, taktik, ak preparasyon pou fè fas ak pi gwo ekip nan zòn nan. Nan nivo sa a, Ayiti ap rankontre pi gwo ekip nan CONCACAF la, tankou Etazini, Meksik, Kanada, ak Jamayik. Malgre sa, pèfòmans yo montre foutbòl ayisyen an kapab reyalize gwo bagay lè genyen bon jesyon ak devouman. Avèk patisipasyon nan Gold Cup 2025 ki deja konfime, Ayiti gen tout dwa pou l reve gwo bagay pou lavni.

KÒMANTÈ

Denye atik yo