Seleksyon Nasyonal

Aprè yon blesi grav ki te fè l rate Mondyal 2023 a, Claire Constant, youn nan poto mitan defans seleksyon ayisyèn nan, ap refè fòs li ak yon nouvo ekip nan Washington D.C. Nan yon entèvyou ak Saint Louis du Nord TV, li pale sou rekiperasyon li, eksitasyon l pou reprann plas li nan seleksyon an, ak objektif li pou ede foutbòl ayisyen an briye pi plis toujou.

An 2023, te gen yon gwo kou nan kominote foutbòl ayisyen an. Grenadyè yo, ki t ap prepare pou premye patisipasyon yo nan yon Mondyal, te pèdi youn nan pyès kle yo : Claire Constant. Defansè santral la te oblije kite rèv li dèyè aprè yon blesi nan ligaman kwaze jenou l pandan li t ap jwe pou klèb li, S.C.U Torreense, nan peyi Pòtigal.

Absans Claire te yon gwo frap pou seleksyon an, ki t ap bati yon defans solid pou fè fas ak gwo ekip mondyal yo. Malgre doulè emosyonèl ak fizik ki te akonpaye blesi sa a, Claire te deside pa bay legen. Atravè terapi ak fòmasyon entansif, li retounen pi fò pase jan li te ye anvan, li montre yon kapasite ak detèminasyon ki inik.

Aprè rekiperasyon li, Claire chanje ekip, nouvo ekip li ale a se DC Power, ki baze nan vil Washington DC. Nan chanpyona USL Super League la, li vin tounen yon poto mitan nan defans ekip la, ak yon prezans ki bay asirans e estabilite. Li te deja jwe 14 match pou ekip la e kontinye fè bon pèfòmans.

Nan entèvyou li ak Wilby Brutus, jounalis Saint Louis du Nord TV, Claire te reponn plizyè kesyon ki touche pèfòmans li, rekiperasyon li, ak avni li ak seleksyon nasyonal Ayisyèn nan. Men kèk moman kle nan entèvyou sa a : Sou sante li: "Mwen vrèman mye kounya. Sa se premye sezon mwen aprè blesi a, e mwen kontan wè mwen avanse byen. Mwen santi m pi fò kounya."

Sou objektif li ak seleksyon an: "M bezwen rejwenn seleksyon an nan pwochen rasanbleman yo. Si yo rele m, m ap vini pou ede ekip la genyen match yo ak bati yon bon ekip." Sou eksperyans li ak DC Power: Claire te eksprime rekonesans li pou nouvo ekip li a, ki fè l santi l alèz pandan l t ap retounen sou teren an.

Malgre rekiperasyon li, anpil fanatik te remake absans li pandan Pink Ladies Cup la, nan mwa oktòb pase a, kote li te seleksyone men pa t patisipe nan okenn nan twa match yo. Kòz absans sa a rete yon mistè, men Claire prefere konsantre sou avni li olye li rete kole nan sa ki sot pase a.

Pandan n ap tann pwochen rasanbleman Grenadyè yo, tout je rete fikse sou Claire, ki detèmine pou pote kontribisyon l pou bati yon ekip ki pi solid e ki pare pou nouvo defi.

KÒMANTÈ

Denye atik yo