Seleksyon Nasyonal

Duckens Nazon, yon non ki tande nan tout kwen foutbòl ayisyen an, te fè yon ane remakab ak seleksyon nasyonal la pandan ane 2024 la. Ak yon total 14 kontribisyon dirèk (11 gòl epi 3 pas) nan 9 match, li te jwè ki pi desizif nan ekip la, avèk pèfòmans ki varye nan eliminatwa Koup Dimond 2026 la, Lig Nasyon CONCACAF la ak yon match amikal.

Ane a te kòmanse ak yon match amikal kont Giyàn Fransèz nan mwa mas la, kote Duckens Nazon te make yon gòl ki te louvri kontè li pou ane a, match la te fini (1-1) kont giyanè yo. Nan mwa jen an, pandan premye tou eliminatwa pou Koup Dimond FIFA 2026 la, Nazon te make kont Sentlisi epi li te bay yon pas gòl kont Babad.

Nan Lig Nasyon CONCACAF la, Duckens Nazon te briye nan faz gwoup la. Kont Pòtoriko nan premye match la, li te make yon gòl enpòtan pou ekip la pran yon rezilta pozitif. Kont Senmaten, li te fè yon pèfòmans istorik ak yon triple nan premye rankont yo, epi li te ajoute 2 gòl ak 2 pas desizif nan match retou a. Kont Awouba, li te fè yon double nan match ale a epi make yon lòt nan match retou a, te fè li kontribye anpil nan sipremasi Ayiti nan gwoup la. Nan dezyèm match kont Pòtoriko, Nazon pa t make ni bay pas desizif, men prezans li sou teren an te toujou enfliyan pou seleksyon an ki te rale yon rezilta san defèt. Nan yon total 9 match, Duckens Nazon reyalize 11 gòl ak bay 3 pas gòl, ki fè l vin pi bon bitè seleksyon an pou ane a.

Anplis kapasite li pou make gòl, Nazon kontinye montre li se yon lidè nan ekip nasyonal la. Li enspire jèn jwè yo ak pèfòmans li pandan konpetisyon yo. Ane 2024 la montre ankò poukisa li konsidere kòm youn nan pi gwo jwè Ayiti nan jenerasyon sa. Fanatik foutbòl ayisyen yo ap tann plis bèl bagay nan men Nazon pandan ane 2025 la ki se yon ane Gold Cup, avèk espwa li pral kontinye make istwa pou seleksyon nasyonal la.

KÒMANTÈ

Denye atik yo