AKÈY AYITI Seleksyon Nasyonal

Seleksyon Nasyonal

Duckens Nazon, 10 ane nan seleksyon ayisyen an : yon chimen k ap trase nan listwa foutbòl nou an

10 desanm 2024 Steve Pierre 323

Nan espas 10 lane, Duckens Nazon fè yon pakou remakab nan seleksyon nasyonal Ayiti a. Sòti nan premye match li nan ekip la an 2014 kont Kosovo. Jounen jodi a, ak 39 gòl epi 10 pas nan 61 match, atakan an tabli tèt li kòm yon pilye nan foutbòl ayisyen an.

Se te yon 5 mas nan lane 2014, lè Duckens Nazon te antre nan gran chimen foutbòl entènasyonal la. Li te sou tèren an nan Adem Jashari Olympic Stadium nan, nan vil Mitrovica, kote Ayiti ta pral jwe kont Kosovo, nan premye match ofisyèl nasyon sa a. Pami 11 jwè ki te kòmanse match la, Duckens te genyen konfyans Marc Collat, antrenè fransè seleksyon an nan epòk sa, te mete l titilè. Malgre l ta pral kite tèren an nan 46èm minit pou Fabien Vorbe, eksperyans sa a te make kòmansman yon gwo karyè ak koulè mayo seleksyon nasyonal Ayiti a.

Jèn gason sa ki fèt 7 avril 1994 monte yon charyo gòl ki mete non li nan dezyèm plas sou lis meyè bitè seleksyon an, dèyè lejann Emmanuel “Manno” Sanon, ki make 47 gòl. Duckens kounye a genyen sèlman 8 gòl dèyè Manno, yon objektif li ka byen reyalize pandan pwochen konpetisyon yo.

Nan 39 gòl li yo, Duckens te demontre kapasite l pou make kont divès kalte advèsè, kèlkeswa nivo yo. Ekip ki plis sibi anba men l se Senmaten, kote li make 10 gòl kont yo. Kont Tikakiyòs, li fè 4 gòl, pandan li make 3 kont Awouba.

Pou lòt ekip yo, estatistik li yo repati fason sa:

2 gòl kont Japon, Kostarika, Grenad, Giyàn Fransèz, Senvensan ak Sentkits. Epi, 1 gòl kont Panama, Onndiras, Jamayik, Kiba, Kanada, Bèmid, Kata, Sentlisi, Monsera ak Pòtoriko.

Aprè anpil eksperyans nan klèb divès rejyon, Duckens Nazon ap evolye jodi a nan chanpyona Tik la, kote li reprezante Kayserispor. Jwè a kontinye make enfliyans li ak vizyon l nan zòn atak la, mete nan tèt li objektif pou pote seleksyon an pi wo, menmsi sou plan kolektif la seleksyon Ayiti a pa fè gwo bagay.

10 lane aprè premye aparisyon li, Duckens Nazon pa sèlman yon jwè; li se yon lidè ak yon egzanp pou nouvo jenerasyon foutbòlè ayisyen yo. Avèk rezilta ki deja eksepsyonèl, rèv li pou depase Manno Sanon ak vin meyè bitè tout tan seleksyon an sanble pi pre pase tout tan. Se yon pati enpòtan nan listwa foutbòl ayisyen ki ap ekri chak fwa Nazon mete balon an nan filè a.