Seleksyon Nasyonal

Pou dezyèm sòti yo nan Pink Ladies Week lan, seleksyon ayisyèn fanm nan konnen yon dezyèm viktwa, aprè yon remonte tèt chaje (3-2) fas Taypeychinwa (Taywann). Yon rezilta ki pa bay twòp satisfaksyon.

Aprè yon premye mitan pratikman rate (0-2), seleksyon ayisyèn lan ta pral sòti grif li nan dezyèm mitan an, prensipalman nan 10 dènye minit yo, pou genyen match la 3-2 fas yon bon ekip Taypeychinwa byen òganize pou defann.

Nan yon premye tan avèk Melchie, apèn sakre “Jwez lane an” nan CONCACAF la, nan 83èm minit sou penalite, seleksyon an ta pral retounen nan match la anvan egalizasyon an kèk minit aprè sou penalite ankò avèk Nérilia Mondesir (86’). Nan tan adisyonèl (90+2’) viktwa ta pral vini avèk Batcheba Louis sou yon kafouyay nan defans lan.

Aprè yon viktwa 4-2 nan premye match la fas Jòdani, Grenadye yo ki pa t jwe ansanm depi fevriye konnen yon dezyèm viktwa nan kad tounwa sa k ap dewoule nan peyi Latiki, prensipalman nan vil Antalya. Twazyèm match la ap vini madi k ap vini la fas Larisi, pou fèmen yon eksperyans ki kapab pote anpil pou seleksyon sa ki te patisipe pandan lane 2023 a pou premye fwa nan Koupdimond fanm.

N ap note, Taypeychinwa se non ofisyèl Taywann adopte pou patisipasyon l nan konpetisyon entènasyonal akoz Repiblik popilè Lachin toujou pa rekonèt yo kòm teritwa endependan. Yon konsansis ki jwenn ant 2 pati yo ki nan yon konfli diplomatik ki la depi kèk tan.

KÒMANTÈ

Denye atik yo