Seleksyon Nasyonal

Seleksyon foutbòl ayisyen an pare pou fè fas ak Sen Maten epi Pòtoriko nan dènye faz Lig Nasyon Concacaf la. Delegasyon an rive nan Mayagüez, Pòtoriko, kote 20 Grenadye yo ap kòmanse preparasyon yo pou de (2) gwo batay sa yo.

Aprè yon vwayaj ki te mennen yo nan San Juan, ayè lendi a, Grenadye yo pase nwit la nan vil sa a anvan yo kontinye vwayaj la pou Mayagüez, kote match yo ap fèt la. Madi sa a, ekip teknik la ak 19 jwè debake, pare pou antre nan dènye faz preparasyon an. Anplis jwè yo ki te deja la, Danley Jean Jacques rejwenn gwoup la nan apremidi a, sa ki monte kantite jwè yo a 20.

Jwè ki prezan yo se : Johny Placide, Frantzdy Pierrot, Stéphane Lambese, Duckens Nazon, Bryan Alceus, Mondy Prunier, Alexandre Pierre, Christopher Attys, Carl Fred Sainté, Dany Jean, Carlens Arcus, Ricardo Adé, Fabrice Picault, Mikaël Cantave, Duke Lacroix, François André Dulysse, Louicius Deedson, Joseph Belmar, ak Martin Expérience.

Ekip la fè premye seyans antrènman li apremidi a pou mete tout jwè yo an kondisyon pou premye match yo kont Sen Maten ki fikse pou vandredi 15 novanm k ap vini la. Sa a se yon match enpòtan, paske li pral mete Ayiti sou yon bon baz anvan rankont kont ekip Pòtoriko a ki ap fèt lendi 18 novanm 2024 la.

Grenadye yo gen tout bagay pou fè yon bèl pèfòmans nan Lig Nasyon an. Ak yon ekip byen prepare ak jwè ki gen eksperyans melanje ak jèn talan, Ayiti espere jwenn yon bon rezilta ki pral kontinye ba yo avantaj nan klasman Concacaf la. Foutbòl ayisyen an kapab konte sou motivasyon Grenadye yo, pandan fanatik yo swete yo pote fyète bay peyi a nan de (2) match enpòtan sa yo.

KÒMANTÈ

Denye atik yo