Seleksyon Nasyonal

Antrenè fransè seleksyon nasyonal la, Sébastien Migné, ap konnen yon bon kòmansman nan tèt Grenadye yo. Pou 7 premye match li yo, li deja fè 6 viktwa ak yon match nil. Li make 24 gòl, li pran 8. Estatistik sila yo pwouve bon travay ansyen antrenè peyi Kenya a nan tèt seleksyon nasyonal la.

Antrenè fransè 51 lane a ap pare l pou dirije 8èm match li nan tèt ekip la. Yon 8èm match ki kapab yon bon eksplwa pou fransè a ak Grenadye yo si yo ta menm fè yon match nil. Match sila a se pral kont Sen Maten jodi vandredi an a 4è nan aprèmidi. Ayiti bezwen yon grenn pwen sèlman pou remonte nan Lig A epi tou kalifye pou 10èm Gold Cup nan listwa l. Eksplwa sila se youn nan gwo anbisyon Sébastien Migné selon deklarasyon l.

Ayiti gen yon seri 6 viktwa youn kole ak lòt ak antrenè fransè a. Pi gwo seri viktwa Ayiti nan tout istwa l se 9 match. Yon seri Sébastien Migné ta vle jwenn e menm depase l. "Pi gwo lide nou se pase lane 2024 la san yo pa bat nou. Se defi sa mwen mete devan mesye yo. Kèlkeswa advèsè nou kontre a fòk nou bat li. Se pou nou mete Ayiti sou sèn kontinantal la, pou tout advèsè nou yo gen krent kontre ak nou", deklarasyon Sébastien Migné nan mikwo FHF.

Pou rapèl, seleksyon an ak Calderón, ansyen antrenè a, te pase yon peryòd 13 mwa sa yo pa fè viktwa. Yon malediksyon Sébastien Migné te retire lè li bat Sent Lisi premye match ofisyèl li 2-1.

KÒMANTÈ

Denye atik yo