Seleksyon Nasyonal

Seleksyon ayisyèn lan fini tounwa Pink Ladies Week lan avèk yon defèt 1-2 fas Larisi nan yon match ki dewoule jodi madi an nan vil Antalya ki te syèj tounwa sa. Yon bon moman pou Grenadye yo ki pa t jwe ansanm depi fevriye.

Malgre Melchie Daëlle Dumornay yon lòt ankò ki fè gòl pou seleksyon ayisyèn lan (46’), Grenadye yo pa rive anpeche defèt sa. Aprè yon premye gòl pou medam Larisi yo depi byen bonè nan match la, seleksyon ayisyèn lan ki pa t janm dekouraje ta pral pran yon dezyèm gòl sou yon koufran dirèk, sèlman yon ti tan aprè egalizasyon Melchie an.

Si dènye match lan fini avèk yon defèt fas medam Larisi yo ki 27èm mondyal, Grenadye yo te konnen 2 siksè nan premye match yo fas Jòdani (4-2) epi Taypeychinwa (3-2). Yon tounwa ki montre kèk siy ki bay ankourajman pou seleksyon ayisyèn lan.

Yon nouvo seleksyonè

Tounwa sa se te okazyon pou dekouvri Malou Quignette kòm nouvo seleksyonè nasyonal, ki ranplase Frédéric Gonçalves li t ap asiste pandan pasaj li nan tèt ekip ayisyèn lan. Pi jèn antrenè fransè k ap dirije yon seleksyon nasyonal aktyèlman, tijèn 27 lane an kòmanse avèk yon bilan jeneral 2 viktwa epi yon defèt jodi madi an.

Yon premye match avèk yon viktwa 4-2 fas Jòdani, mete sou yon remonte fas Taypeychinwa (3-2) avèk 3 gòl nan 10 dènye minit yo, Malou Quignette k ap fè premye gwo eksperyans li nan tèt yo ekip jwenn senpati anpil sipòtè seleksyon ayisyèn lan pou kalite pèfòmans seleksyon an pandan 3 match sa yo. Fas Larisi, Grenadye yo pèdi yon match kote yo t ap domine pandan 90 minit yo.

Chwa taktik

Nan yon chema 4-2-3-1 nan tout twa match yo, nouvo seleksyonè nasyonal lan vini avèk yon filozofi diferan de jan ekip ayisyèn feminen an abitye jwe, menmsi gen kèk resanblans avèk ekip Gonçalves la. Pou premye fwa, nou te kapab wè Amandine Pierre-Louis kòm elye dwat, pozisyon li abitye jwe nan klèb li AS Saint-Etienne.

Avèk absans Sherly Jeudy, youn nan kad ekip sa, ki blese avèk RC Lens, nouvo seleksyonè nasyonal la, menmsi l konsève sistèm mitan tèren a twa a, eseye repozisyone Anyssa Ibrahim pou òganize jwèt la avèk kalite pas epi vizyon li nan jwèt lan. Yon chwa ki pote fwi avèk jwez Club Albergaria a ki te fè gòl nan premye match la fas Jòdani.

N ap note egalman tounen Jasmine Vilgrain, defansè Rodez Aveyron, nan ekip nasyonal la ki jwe tout twa match yo bò kote Tabita Joseph ki livre yon kokennchenn pèfòmans nan match fas Larisi an malgre Ayiti pèdi. Jwez 22 lane an ki te jwe premye fwa pou Ayiti nan lane 2022 fas Pòtigal, nan yon match nou te pèdi 5-0, se pratikman nouvo tèt ki entegre ekip nasyonal la, si n konsidere pasaj Malou Quignette kòm asistan Gonçalves lan.

N ap raple, seleksyon ayisyèn lan pral gen yon kalandriye chaje pou ane 2025 lan, avèk prensipalman eliminatwa pou W Concacaf Championship lan. Avan sa, ap genyen yon fenèt FIFA pou fen mwa novanm lan kote prèske tout ekip nasyonal ap pwofite jwe. Kesyon k ap poze, èske seleksyon ayisyèn lan ap jwe pandan peryòd sa?

KÒMANTÈ

Denye atik yo