Seleksyon Nasyonal

Dènye trèv entènasyonal foutbòl fanm nan se pou semèn sa, men Grenadyè yo rete san aktivite. Avèk sèlman kat (4) match jwe pandan ane 2024 la, FHF montre mank vizyon ki kapab koute seleksyon an nan klasman FIFA a epi fè l rate opòtinite pou konstwi yon ekip ki solid.

Malgre Ayiti genyen talan eksepsyonèl tankou Melchie Dumornay, Batcheba Louis ak Amandine Pierre-Louis, pou n site sa yo sèlman, Federasyon Foutbòl Ayisyen an (FHF) pa rive itilize kapasite Grenadyè yo pou byen prepare yo ak konpetisyon entènasyonal yo. Ane sa a, sèlman kat (4) match te jwe: yon defèt (1-0) kont Pòtoriko nan mwa fevriye ki te elimine Ayit nan faz kalifikasyon Gold Cup yo, epi twa lòt match nan Pink Ladies Cup la nan mwa oktòb pase a, kote yo genyen kont Jòdani (4-2) ak Taypey Chinwa (3-2), men pèdi kont Larisi (2-1).

Sa ki pi grav, se absans total match pandan trèv FIFA yo, tankou sa nou ye la, mwa septanm pase a epi pandan koumansman ete a. Kote lòt seleksyon yo ap pwofite amelyore kapasite taktik yo ak pozisyon yo nan klasman FIFA a. Nan dènye klasman FIFA a nan mwa dawout, Haïti te klase 53èm bò kote medam yo. San aktivite, seleksyon an riske pèdi plis plas nan pwochen klasman ki ap sòti 19 desanm k ap vini la.

Se pa premye fwa pwoblèm òganizasyonèl mete Grenadyè yo nan dezavantaj. Nan mwa me 2024, de (2) match amikal kont Ekwatè te anile akoz pwoblèm viza, selon sa biwo kominikasyon FHF la te di. Sitiyasyon sa a montre klèman yon mank planifikasyon ak pwofesyonalis ki ap brannen avni foutbòl fanm nan peyi a.

FHF dwe sispann gaspiye potansyèl foutbòl fanm nan. Yon ekip tankou sa nou genyen an bezwen match regilye, bon preparasyon ak yon vizyon klè pou kontinye pwogrese. Lè lòt peyi yo ap pran devan, nou paka rete dèyè. Si FHF pa fè chanjman estratejik, Grenadyè yo ap kontinye fè fas ak baryè ki fèt sèlman pa neglijans ak mank vizyon.

KÒMANTÈ

Denye atik yo