Seleksyon Nasyonal

Seleksyon Ayiti fè yon bèl kado bay fanatik yo pandan ane 2024 la, kote yo fini ak zewo defèt nan 9 match yo te jwe. Avèk Sébastien Migné kòm nouvo antrenè, Grenadye yo remonte nan Lig A Lig Nasyon CONCACAF la epi yo deja kalifye pou Gold Cup 2025.

Nan yon nòt Federasyon Ayisyèn Foutbòl la te fè jou ki te 8 mas 2024 la, Sébastien Migné te pran tèt seleksyon nasyonal gason Ayiti a, ranplase nan pòs sa Gabriel Calderón Pellegrino. Sou lidèchip li, ekip Grenadye yo pwouve fòs yo avèk yon bilan eksepsyonèl: 9 match jwe, 8 viktwa, 1 match nil, 35 gòl make, 8 gòl pran.

Seri match sa yo te kòmanse ak yon match amikal kont Giyàn Fransèz ki te fini 1-1, men aprè sa, Grenadye yo montre dominasyon yo. Yo bat Sent Lisi (2-1) ak Babad (3-1) nan kad eliminatwa Koup Dimond lan. Nan Lig Nasyon CONCACAF la, yo kraze ekip tankou Pòtoriko (4-1, 3-0), Sen Maten (6-0, 8-0), ak Awouba (3-1, 5-3).

Duckens Nazon te chaje balans lan pou seleksyon an pandan tout ane a. Avèk 11 gòl ak 3 pas desizif nan 9 match, Nazon fini kòm pi bon atakan seleksyon an pou ane 2024 la. Li te desizif nan preske chak match yo. Sa fè li tou dezyèm pi bon bitè seleksyon foutbòl ayisyen an.

Ayiti pa sèlman retabli plas li nan Lig A Lig Nasyon an, men tou li gen tikè li nan Gold Cup 2025, yon bèl opòtinite pou seleksyon an kontinye fè listwa. Avèk retou l nan Lig A a, Ayiti ap jwe kont pi gwo ekip nan zòn CONCACAF la tankou Meksik, Etazini, Kanada, ak lòt gran nasyon nan Karayib la. Sa vle di Grenadye yo gen chans pou yo fè tès kont ekip ki pi fò yo, yon eksperyans ki pral sèvi anpil nan preparasyon yo pou Gold Cup 2025 la ak rès eliminatwa Koup Dimond 2026 la. Gold Cup la, ki ap fèt nan peyi Kanada ak Etazini, sa ofri yon platfòm ideyal pou Ayiti montre kapasite li epi fè fanatik li yo kontan ankò.

Malgre tout reyalizasyon sa yo, defi yo poko fini. Seleksyon Ayiti a ap antre nan yon 2025 ki gen gwo enpòtans, ak match ki rete yo nan kad eliminatwa Koup Dimond 2026 la ak patisipasyon nan Gold Cup 2025 ki pral fèt Kanada ak Etazini, sòti 14 jen rive 6 jiyè 2025. Fanatik yo gen tout rezon pou yo fyè, men yo dwe kontinye soutni Grenadye yo nan sa ki ap vini yo. Ane 2024 la te san fay, men pi bon rezilta toujou ap tann yo pi douvan.

KÒMANTÈ

Denye atik yo