Concacaf Caribbean Cup

Real Hope FA pral fè fas ak Moca FC nan yon gwo match pou twazyèm plas nan Concacaf Caribbean Cup 2024, jodi madi 26 novanm nan, a 6zè nan aswè, nan estad Cibao a nan lakou Repiblik Dominikèn. Match sa ap deside kiyès ki pral ranpòte dènye tikè pou patisipe nan Concacaf Champions Cup 2025 lan.

Real Hope te rive nan faz sa gras ak yon bèl pèfòmans nan gwoup yo, kote yo te rete san defèt ak yon bilan 2 viktwa 2 match nil ak 0 defèt. Nan demi-final yo, yo ta pral bite sou chanpyon dominiken yo, Cibao FC. Gooly Elien, gadien vedèt ekip la, te make diferans lan pandan faz gwoup yo avèk 10 parad ak 2 match san l pa pran gòl. Mete sou sa, yo te jwenn sipò atakan yo a, Angelo "Waby" Exilus, ki gentan make 5 gòl nan konpetisyon an.

Sou lòt bò a, Moca FC te fè eksperyans ak yon premye Concacaf Champion Cup an 2023, e yo vle retounen nan menm konpetisyon an ane k ap vini an. Malgre yo te fè bon rezilta nan gwoup yo (3 viktwa, 1 match nil), yo te sibi yon gwo defèt (7-0) kont Cavalier FC nan demi-final yo. Defans Moca ap febli plis ak absans gadien Miguel Báez ak mitan teren Jesús Correa, tou de(2) sispann apre katon wouj nan demi-final yo.

Match sa gen gwo konsekans pou tou de (2) ekip yo, espesyalman pou Real Hope ki dwe fè tout sa yo kapab pou evite pran gòl, akoz règ gòl an deplasman an ki aplike nan konpetisyon an. Match retou a ap fèt nan estad Moca 85 lan, toujou an Repiblik Dominikèn, madi 3 desanm k ap vini la, kote tout bagay ap klè sou kiyès ki pral 3yèm reprezantan klèb Karayib yo nan CCC 2025 lan.

KÒMANTÈ

Dènye atik yo