la Liga

Ekip madrilèn nan kite rete sou yon defèt kont Bilbao pandan semèn nan pou match avanse 19èm jounen Liga a, ebyen yo te an deplasman lakay Girona samdi kote yo bat (3-0), e tou met plis presyon sou FC Barcelone nan klasman chanpyona a.

Gras avèk yon gwo Jude Bellingham, Real Madrid byen bat Girona nan 16èm jounen Liga a. Se te yon bon premye mitan kote klèb madrilèn nan t ap sibi nan match la. Men yo pa t rive kraze ladan l paske yo t ap veye tout lè l yo pou pa bay Girona espas nan match la. Nan 36èm minit match la, Jude Bellingham ta pral make gòl (1-0) la aprè yon balon ki t ap flannen anndan sifas la, se sou eskò sa mitan match la te fini !

Nan dezyèm mitan an, se la nou ta pral jwenn yon pi bon ekip Real Madrid kote Arda Güler te leve nivo a. Jude Bellingham te toujou ap pot danje yo, e Kylian Mbappé te rantre nan match la. Entènasyonal Anglè a, Jude Bellingham, ta pral fè yon sipèb pas gòl pou Arda Güler ki limenm te mete match (2-0), lè sa nou t ap jwe 55èm minit nan match la. Kèk minit aprè, nan 62èm minit, Kylian Mbappé ta pral klotire eskò match la (3-0) sou yon pas li resevwa de Luka Modrić. Malgre rantre Raúl Asencio, Dani Ceballos, Fran García ak Endrick nan match la, eskò (3-0) a te rete aprè 90 minit yo !

Yon gwo match pou Jude Bellingham. Se limenm Liga a chwazi kòm pi bon jwè match la, e menm Jude sa rete sou senk (5) match nan chanpyona espanyòl la kote l ap fè gòl. Se senk (5) gòl ak de (2) pas gòl.

KÒMANTÈ

Dènye atik yo