AKÈY FIFA Lòt koze

Lòt koze

Brezil 2024 : Yon pil atakan san chif

21 novanm 2024 Steve Pierre 540

Seleksyon brezilyen an, ki te domine mond foutbòl pandan dè dekad, pa genyen menm plezi li te genyen nan tan lontan. Dènye ane yo montre yon ekip ki ap pèdi fòs, ak pèfòmans ki mete lapèn lakay fanatik li yo. Dènye tit seleksyon an remonte an 2019, e depi lè sa, yo sibi plizyè echèk ki fè anpil moun poze kesyon sou pozisyon yo kòm yon gwo fòs nan foutbòl mondyal.

Dènye fwa Brezil te ranpòte yon konpetisyon, se te Copa América 2019, men depi lè sa, rezilta yo pa satisfè fanatik yo. Copa América 2021: Seleção a pèdi nan final kont Ajantin, copa América 2024: Yo elimine nan kadefinal kont Irigwe. Anvan sa, Koup di Mond 2022 a: Yo elimine nan kadefinal, yon eliminasyon ki te yon gwo chòk pou fanatik yo.

Nan Eliminatwa Mondyal 2026 yo, ekip la kontinye ap konbat. Li fè plizyè match nil oswa pèdi kont ekip tankou Venezyela, Ekwatè, ak Kolonbi, ekip ki nan tan pase te konn fasil pou yo. Feblès sa yo montre yon degradasyon ki fè seleksyon an difisil pou rekipere pozisyon li nan rejyon an ak nan mond lan.

Brezil toujou te peyi gwo atakan tankou: Pelé, Romário, Ronaldo, Rivaldo. Men, ane 2024 montre jenerasyon aktyèl la gen difikilte pou konvèti okazyon yo an gòl. Malgre jwè yo fè bèl bagay nan klèb men ak mayo seleksyon an yo pa pote menm rezilta.

Estatistik atakan yo pou ane 2024 la montre yon pwoblèm efikasite grav:

● Igor Jesus: Jwe 4 match (4 titilarizasyon), 4 okazyon kreye, 1 gòl, 1 pas gòl.

● Endrick: Jwe 7 match (1 titilarizasyon), 3 gòl.

● Savinho: Jwe 12 match (6 titilarizasyon), 1 gòl, 2 pas gòl, 17 okazyon kreye.

●Raphinha: Jwe 12 match (11 titilarizasyon), 4 gòl, 1 pas gòl, 16 okazyon kreye.

● Luiz Henrique: Jwe 6 match (1 titilarizasyon), 2 gòl, 1 pas gòl, 4 okazyon kreye.

● Vinicius Junior: Jwe 11 match (10 titilarizasyon), 2 gòl, 1 pas gòl, 18 okazyon kreye.

● Rodrygo: Jwe 11 match (11 titilarizasyon), 3 gòl, 17 okazyon kreye.

● Martinelli: Jwe 7 match (1 titilarizasyon), 1 gòl, 1 okazyon kreye.

Malgre yo kreye plizyè okazyon, efikasite devan gòl rete yon gwo pwoblèm. Yon jwè tankou Vinicius Junior, ki konsidere kòm youn nan pi gwo talan jenerasyon li an, sèlman reyalize 2 gòl nan 11 match. Raphinha, ki jwe 12 match pandan ane a, rive fè 4 gòl, men sa rete lwen nivo seleksyon brezilyen an te konn ap tann de yon atakan.

Brezil te toujou yon referans nan mond foutbòl la, men 2024 la konfime yon reyalite tris: seleksyon an pa menm ekip li te ye nan tan lontan. Kèk fanatik espere jenerasyon aktyèl la ka reprann kontwòl li, men pou kounye a, ekip 5 etwal la ap viv yon kriz pèfòmans ki te kòmanse depi kèk ane.