AKÈY FIFA Lòt koze

Lòt koze

Federasyon Almay la seleksyone yon jwè ki pa menm Alman

9 novanm 2024 Steve Pierre 442

Yon istwa byen komik rive federasyon foutbòl alman an ki te anonse yo seleksyone yon jwè ki, nan tout sans, pa gen okenn lyen ak peyi a. Dario Sits, yon jèn jwè ki sòti nan peyi Letoni, ki gen 20 lane, te rive tou prè pou fè pati ekip foutbòl nasyonal alman an pou dènye match yo nan Lig Nasyon yo.

Federasyon foutbòl alman an te kreye yon gwo sipriz lè li pibliye lis 23 jwè ki ta dwe jwe nan faz final Lig Nasyon yo. Non Dario Sits te parèt sou lis sa a, yon jèn atakan ki sòti nan peyi Letoni e ki ap jwe pou klèb Parme e ki prete pou kounye a nan Helmond Sport. Sits ta kapab kòmanse karyè entènasyonal li avèk Almay... men pwoblèm lan, e pa yon ti pwoblèm, Sits se yon sitwayen Letoni ki pa gen okenn rapò ni otorizasyon pou jwe pou seleksyon Alman an.

Federasyon alman an eksplike te gen yon erè nan sistèm enfòmatik yo ki fè non Sits parèt sou lis la. Sa te mennen anpil reyaksyon. Pami yo, reyaksyon seleksyon Letoni an sou rezo sosyal yo te rapid. Sou X, federasyon leton an te fè yon blag amizan : "Nou apresye enterè nou, men vòl Dario Sits pou Riga deja rezève." (Riga se kapital peyi Letoni). Pou fè bagay yo pi lejè, alman yo reponn ak yon GIF ki di 'Oops', sa ki fè tout moun ri ak sa yo nou te ka rele "ti erè" sa a.

Malgre ti malantandi sa, Almay ap rete konsantre sou objektif li yo. Seleksyon alman an bezwen yon sèl pwen pou valide plas li nan kadefinal yo e ap pare pou l kontre Bosni ak Ongri le 16 ak 19 novanm k ap vini la.