AKÈY FIFA Lòt koze

Lòt koze

Julian Álvarez: yon kòmansman timid nan Atletico Madrid

28 novanm 2024 Steve Pierre 421

Aprè transfè istorik li soti Manchester City nan mwa dawout 2024 la, Julian Álvarez travèse nan Atlético Madrid. Atakan Ajanten an ki gen 24 lane, montre kapasite eksepsyonèl li pandan l ap eseye adapte l nan sistèm Diego Simeone a.

Julián Álvarez, ki fèt 31 janvye 2000, te kòmanse ekri non li nan istwa foutbòl pwofesyonèl depi nan jèn laj li. Grandi nan River Plate, kote li te parèt kòm youn nan jèn jwè ki gen plis talan nan Amerik Latin nan, nan dat 31 janvye 2022, jou anivèsè li, Manchester City te anonse yo siyen l pou yon kontra 5 lane edmi pou yon montan 23 milyon ewo. Malgre sa, li te rete nan River Plate an prè jiskaske l te rantre ofisyèlman nan ekip anglè a 8 jiyè 2022.

Pandan 2 zan li pase nan Manchester City, Álvarez te jwe 103 match, make 36 gòl, epi ede ekip la ranpòte 6 tit. Pami yo, yon Lig Chanpyon UEFA nan lane 2023. Men, anvi genyen plis tan sou teren an pou jwe ak evite rete nan lonbraj Erling Haaland te fè l chèche yon nouvo defi. Malgre entère Paris Saint Germain, li te chwazi Atlético Madrid, kote li jwenn yon antrenè ki pataje menm kilti ak li, Diego Simeone, ansanm ak lòt Ajanten nan ekip la. Transfè li te koute 70 milyon ewo ak 20 milyon ewo bonis, epi li siyen yon kontra 6 lane pandan l ap pote nimewo 19 la.

Julian Álvarez deja montre adaptabilite l nan foutbòl Espay la. Nan Lig Chanpyon UEFA, li deja gen estatistik malgre li menm: 5 match, 5 titilarizasyon, 3 gòl, ak yon pèfòmans briyan tankou nan match avanyè a kont Sparta Prague kote li make 2 gòl pandan ekip li te kraze advèsè a (0-6).

Nan Liga, Julian jwe 14 match, kòmanse 9 ladan yo, li make 4 gòl ak bay 1 pas gòl. Li montre yon bon sans pozisyon ak abilite pou adapte l nan presyon ak ritm diferan ki karakterize lig Espayòl la. Nan Koup Espay lan, li montre efikasite l lè li make 2 gòl nan sèl match li jwe nan konpetisyon an.

Depi kòmansman sezon an, Julian Álvarez gentan jwe 20 match pou Atlético Madrid, avèk 15 kòm titilè. Li make 9 gòl ak fè yon pas desizif nan tout konpetisyon yo. Jèn Ajanten an ap eseye montre yon kokennchenn potansyèl nan sistèm Diego Simeone a epi li ka vin youn nan jwè kle ki pral ede klèb rojiblanco a ranpòte tit enpòtan pandan sezon 2024-2025 la. Fanatik yo rete optimis Julian ap kontinye ekri non li nan istwa foutbòl la ak Atlético Madrid.