AKÈY FIFA Lòt koze

Lòt koze

Fabio Paim: Sòti jwè foutbòl pou rive aktè pòno

2 novanm 2024 Steve Pierre 743

Fabio Paim, yon ansyen foutbolè ki te pwomèt anpil. Pòtigè a te grandi nan menm sant fòmasyon ak Cristiano Ronaldo, li deklare kounye a li vle fè karyè nan endistri fim pònografi. Ak anpil talan lè li te jèn, li te wè tèt li pi bon pase Ronaldo. Men, lavi li te vire tou won, e kounye a li chèche yon nouvo wout.

Fabio Paim te toujou konsidere tèt li kòm yon jeni ki te genyen plis talan pase Cristiano Ronaldo. Li te fè sant fòmasyon Sporting CP an nan peyi Pòtigal kote li te jwenn opòtinite pou jwe ak Ronaldo. An 2008, li te fè yon etap rapid nan Chelsea FC anba men Luiz Felipe Scolari, men li pa t janm briye. Lavi l sou teren foutbòl la te ranpli ak move chwa, sa ki fè li fè fas ak prizon an 2019 pou trafik dwòg. Men, menm aprè tout move wout sa yo, Fabio Paim pa sispann fè pale de li. Nan yon entèvyou, li di li ta renmen antre nan fim pònografi pou reyalize "yon rèv".

Paim kontinye afime li te gen plis talan pase Cristiano, e si li te gen menm detèminasyon ak li, li t ap rive nan menm nivo ak Ronaldo ak Messi. Kòm li te di: "Si m te gen mwatye nan tèt Cristiano, mwen t ap sou menm tab ak li ak Messi". Kounye a, Paim deklare endistri pònografi se nouvo rèv li, e li pa santi l wont pou antre nan jaden sa a.

Fabio Paim te yon talan ki pa janm rive reyisi nan foutbòl la, men kounye a li chèche yon lòt chimen pou li jwenn ekilib li. Èske sa ap ede l retounen sou pye li, oswa èske li pral rete yon istwa kapote? Se sèlman tan an k ap bannou repons sa.