AKÈY FIFA Lòt koze

Lòt koze

Fanmi Diego Simeone : Yon fanmi foutbòl

11 novanm 2024 Steve Pierre 596

Diego Simeone, antrenè Atlético Madrid la, gen twa pitit gason ki swiv tras li nan foutbòl. Yon papa ki reyalize bèl bagay ni kòm jwè ni kòm antrenè e ki gen pitit k ap fè wout yo nan foutbòl pwofesyonèl la.

Diego Simeone se yon antrenè foutbòl ak ansyen jwè seleksyon ajantinn nan, ki gen repitasyon pou pasyon li ak yon stil jwèt bout di. Depi 2011, li se antrenè Atlético Madrid, yon klèb nan chanpyona Espay la, kote li te konnen anpil siksè, tankou genyen chanpyona Espay la, Lig Ewopa, e li te rive nan de (2) final Lig Chanpyon. Simeone se yon figi ki gen anpil respè an Ewòp, yo rekonèt li pou taktik li, disiplin li, kapasite li pou motive jwè li yo, ak apwòch defansif ki solid anpil, sa nan langaj lari a yo souvan di ekip sa ap bare oubyen ekip la monte yon bis devan kan li.

El Cholo gen twa pitit gason ki swiv pasyon li pou foutbòl. Yo tout ap jwe nan nivo pwofesyonèl e chak fè wout yo nan pwòp fason yo, menm si yo pa fè gwo karyè tankou papa yo. Giovanni Simeone, ki fèt 5 Jiyè 1995 nan vil Buenos Aires, se pi gran nan twa frè yo e yo rele l "El Cholito." Giuliano Simeone, ki fèt 18 desanm 2002 nan vil Wòm, peyi Itali, se pi piti a e li se yon jwè entènasyonal ajanten, paske li jwe pou seleksyon olenmpik la. Gianluca Pablo Simeone, ki fèt 23 Jiyè 1998, jwe kòm atakan pou Rayo Majadahonda nan Segunda Federación nan peyi Espay.

Pi jèn nan, nan Atlético Madrid, Giuliano Simeone, ki gen 21 an, se pi piti nan twa frè yo. Kounye a l ap jwe tankou atakan nan ATM, menm klèb papa l ap dirije a. Pandan sezon sa a, Giuliano deja jwe 8 match, ak 3 kòm titilè. Li te make 1 gòl kont Las Palmas epi fè 2 pas gòl. Anpil sipòtè espere wè Giuliano grandi anba men papa l kòm antrenè.

Giovanni Simeone, ki gen 29 an, jwè SSC Napoli, yon lòt atakan nan fanmi an. Li gen pwòp stil li, men li toujou rete fidèl a lespri fò ki karakterize fanmi Simeone a. Sezon sa a, Giovanni jwe 12 match, kote li make 1 gòl epi bay 1 pas gòl. Nan Naples, Giovanni ap chèche kreye non pa l pandan l ap fè onè fanmi l sou teren an.

Gianluca Simeone, ki gen 26 an, ap jwe kòm atakan tou nan Rayo Majadahonda. Sezon sa a, Gianluca gentan jwe 10 match epi make 3 gòl, sa ki montre travay li sou teren an. Li ka pa nan yon ekip tankou Atlético oswa Napoli, men Gianluca montre menm disiplin ak detèminasyon ke fanmi li konnen pou li.

Fanmi Simeone a se yon veritab fanmi foutbòl, ak yon papa ki bay bon egzanp kòm antrenè e twa pitit gason ki chwazi menm chemen an. Chak nan yo ap grandi nan pwòp fason yo, men yo pote nan kè yo eritaj Diego Simeone a.