AKÈY FIFA Lòt koze

Lòt koze

Vinicius Júnior: Wa Real Madrid, jwè òdinè ak seleksyon Brezil la

22 novanm 2024 Steve Pierre 372

Vinicius Júnior ap fè tèt li yon plas nan listwa foutbòl ak pèfòmans ekstraòdinè li nan Real Madrid. Sepandan, pèfòmans li ak seleksyon Brezil la kite anpil kesyon. Ki sa k eksplike gwo diferans sa a? Èske li yon pwoblèm sistèm, adaptasyon, oswa presyon?

Nan Real Madrid, Vinicius pa jis yon jwè, li se poto mitan klèb la. L ap pote ekip la kèk tan, men pandan ane 2024 la, li make listwa plis avèk yon seri reyalizasyon tèt chaje. Nan Ligue des Champions yo li te make gòl nan final kont Borussia Dortmund ki ofri klèb la yon lòt kouwòn ewopeyen. San n pa bliye gwo bout pèfòmans li bay a chak etap konpetisyon sa, dayè li te menm fini MVP li.

Pou Liga Espanyòl la, Real Madrid fini kòm chanpyon, e kontribisyon Vinicius te esansyèl pandan tout sezon an, pou 26 match jwe li te make 15 gòl ak bay 5 pas gòl.

Nan Sipèkoup Espay lan, nan yon final ki te vire an yon masak kont FC Barcelone, Vinicius make twa gòl, nan yon viktwa (4-1), ki konsakre l kòm pi bon jwè match la. Sipèkoup Ewòp, yon lòt final, yon lòt gòl enpòtan pou Real Madrid kont Atalanta.

Nan sezon aktyèl la (2024-2025), estatistik li yo make la diferans: 17 match, 12 gòl, 7 pas gòl. Li domine foutbòl ewopeyen an, li fè defans yo pè l, e li jwe yon wòl dirijan nan tout aspè taktik Real Madrid. Klèb la ofri l yon anviwònman kote tout bagay fèt pou l briye yon antrenè ki mete konfyans nan li, jwè tankou Valverde, Modric, Rodrygo ak Bellingham pou l kolabore, ak yon sipò fanatik yo ki renmen li anpil.

Vinicius nan mayo seleksyon Brezil la se yon lòt istwa. Malgre talan li, rezilta yo pa mache. Nan ane 2024 la, li te jwe 11 match, ak seleksyon an, epi li fè 2 gòl kont Paragwe nan Copa America a ak bay yon pas gòl kont Meksik nan yon match zanmitay, 9 match kote li pa t fè okenn kontribisyon ofansiv (ni gòl, ni pas gòl).

Pandan Copa América a, li te gen yon opòtinite klere, men li rate match kadefinal la kont Irigwe akoz akimilasyon katon jòn pou move konpòteman li. Absans li te yon gwo kou pou ekip la, ki te elimine nan etap sa. Nan eliminatwa Mondyal 2026 yo, li rate yon penalite desizif kont Venezyela, epi Brezil sèlman ranpòte yon sèl match pandan li sou teren an, gras ak yon gòl Rodrygo kont Ekwatè. Estatistik jeneral li yo ak seleksyon an bay gwo kè kase : 36 match 5 gòl ak 5 pas gòl.

Yon bagay evidan: Vinicius briye nan yon estrikti ki maksimize kapasite li. Nan Real Madrid, li gen libète pou eksprime tèt li ak jwè ki konprann mouvman li yo. Men, nan seleksyon Brezil la, li sanble pèdi nan yon sistèm ki pa adapte ak fòs li yo. Olye l se motè ekip la, li parèt kòm yon jwè ki soufri anba presyon jere eritaj Neymar a.

Vinicius Júnior ap viv de (2) reyalite kontrè: yon wa nan Real Madrid kote tout bagay mache, e yon jwè òdinè nan seleksyon Brezil la kote pèfòmans li pa rive reponn a atant yo. Si l vle konsakre tèt li kòm yon lejann foutbòl, li dwe montre li ka pote mayo Brezil la ak fyète epi mennen seleksyon an nan nivo espwa fanatik yo genyen. Pou kounye a, diferans ant klèb ak seleksyon li rete yon gwo pwen enterogasyon nan karyè li, èske yon moun p ap gen rezon si yo rele l jwè klèb?