AKÈY FIFA Lòt koze

Lòt koze

Yon ansyen jwè nan Premier League la pral pase 20 lane nan prizon

15 desanm 2024 Benswilkenson Jean 281

Ansyen jwè Everton ak ansyen jwè Shefield United, Li Tie, kondane pou pase 20 lane nan prizon.

Lajistis nan peyi Lachin rekonèt ansyen antrenè seleksyon Lachin lan koupab nan zak koripsyon pandan pasaj li nan foutbòl.

Selon tribinal Peken an, ansyen jwè 40 lane a koupab paske li admèt li te konn pran lajan pandan pasaj li kòm antrenè seleksyon Lachin lan pou konvoke jwè ak pou fè jwè jwe.

Enfomasyon yo kontinye fè kwè endividi a te konn bay lajan ak moun pou ede l rive pran tèt seleksyon Lachin lan kòm antrenè epi li te konn peye pou fè koken nan match yo tou.

Selon televizyon piblik CCTV, Li Tie ki t ap dirije klèb Hebei Fortune ak Wuhan Zall te pran anviwon 6,7 milyon ewo nan men jwè yo.

Menm chèn televizyon sa fè konnen Li Tie te konn bay plizyè prezidan gwo klèb nan peyi Lachin lajan pou ede l vin antrenè seleksyon an.

Lajistis rekònèt ansyen jwè Everton lan koupab paske l avwe li pran anviwon 10 milyon ewo nan zak koripsyon.

Pou rapèl, nan dènye tan sa yo, gouvènman ak Lajistis nan peyi Lachin ap fè yon lavaj nan kesyon espò a.

Apre Li Tie ki kondane pou 20 lane, gen ansyen sekretè jeneral federasyon chinwa Liu Yi ki kondane pou pase 11 lane nan prizon pou koripsyon.

Genyen tou ansyen chèf biwo abit yo, Tan Hai ki kondane pou pase 6 lane edmi nan prizon pou koripsyon. Yon lòt bò gen Qi Jun ansyen chèf planifikasyon estratejik federasyon an ki kondane pou 7 lane. Anvan sa te gen ansyen prezidan federasyon an, Chen Xuyuan, ki kondane pou pase tout rès lavi l nan prizon.