AKÈY FIFA Lòt koze

Lòt koze

Yon jounen foutbòl ki vire an katastròf nan peyi Pewou

4 novanm 2024 Steve Pierre 722

Yon match foutbòl k ap dewoule nan lapè nan vil Chilca, Huancayo, peyi Pewou, te fini nan dèy lè yon kout zeklè te frape teren an, touye José Hugo De la Cruz Meza, yon jwè 34 lane, epi blese kat lòt moun.

Ayè dimanch lan te sanble ap prale tankou yon jounen nòmal kote tout moun t ap pran plezi yo nan espò, men laperèz te ranplase kè kontan lè yon kout zeklè desann sou teren foutbòl kote C.D. Juventud Bellavista ak U.D. Familia Chocca t ap jwe yon match nan yon tounwa rejyonal. Lè loray la te kòmanse anvayi syèl la nan 4 è nan aprèmidi, yo te sispann match la, e jwè ak espektatè te kouri pou pran refij yon kote ki t ap parèt byen. Malerezman, kout zeklè a te tonbe sou defansè De la Cruz Meza ak gadyen Juan Chocca Llacta, avèk plizyè lòt jwè tou.

Gade video dram sa a ki montre kòman zeklè a te desann, e ki montre mizè ak enkapasite lèzòm devan lanati, te make anpil moun ki t ap gade evènman sa a an dirèk. Nan imaj sa yo, nou wè kout zeklè a fèt, epi nou wè yon boul lafimen ak pousyè k ap leve bò kote viktim yo, aprèsa yo tout tonbe atè a. Videyo a te fè wonn rezo sosyal yo e te kreye yon gwo emosyon toupatou.

Malgre jwè blese yo te kouri ale rapid nan lopital Carrión nan Huancayo, yo pa t ka sove lavi José Hugo De la Cruz Meza. Gadyen Juan Chocca Llacta, ki blese grav, ap resevwa swen espesyalize, ansanm ak twa lòt jwè ki blese yo. Trajedi sa a, ki touche tout kominote a, mande ranfòse enpòtans mezi sekirite nan evènman espòtif yo, espesyalman nan zòn mòn yo kote loray gen tandans frape. Nou menm nan GolAyiti nou pwofite atik sa pou nou voye senpati nou bay tout zanmi ak fanmi viktim yo, epi tou ak pèp pewouvyen an nan moman difisil sa.