AKÈY FIFA Mondyal Club

Mondyal Club

Koup Dimond Klèb 2025: Yon Nouvo Dimansyon pou Foutbòl Mondyal la

sous: GolAyiti/imaj

30 novanm 2024 Steve Pierre 757

Koup Dimond Klèb FIFA 2025 pral make yon nouvo chapit nan listwa foutbòl la. Premye fwa nan listwa konpetisyon an, 32 ekip ki sòti nan 6 konfederasyon kontinan yo pral fè fas youn ak lòt nan yon konpetisyon ki genyen menm estrikti ak Koup Dimond FIFA seleksyon yo. Evènman an ap fèt Ozetazini, sòti 15 jen pou rive 13 jiyè 2025, avèk 12 vil ameriken ki pral sèvi kòm sant dakèy match yo.

Kontrèman ak ansyen edisyon yo ki te gen mwens ekip, edisyon sa a ap gen yon estrikti pi konplèks ki gen fòm sa. Faz gwoup yo : 32 ekip yo divize an 8 gwoup ki genyen 4 ekip yo chak. Chak ekip ap jwe youn kont lòt nan gwoup la yon sèl fwa. De (2) premye ekip yo nan chak gwoup ap kalifye pou 8èmdefinal yo.

Faz eliminatwa a ap kòmanse depi 8èmdefinal yo, kote chak match ap fèt sou yon sèl manch. Ap genyen match kadefinal, demifinal, epi final la ap fèt nan MetLife Stadium nan vil Nouyòk, pa bliye p ap gen match pou twazyèm plas.

12 vil ameriken ap sèvi kòm sant dakèy pou tout match konpetisyon an : Atlanta (Mercedes-Benz Stadium), Chalòt (Bank of America Stadium), Sennsinati (TQL Stadium), Lòsannjelès (SoFi Stadium), Miyami (Hard Rock Stadium), Nachvil (Nissan Stadium), Nouyòk (MetLife Stadium), Òlando (Camping World Stadium), Filadèlfi (Lincoln Financial Field), Siyatèl (Lumen Field) ak Wachintonn (FedExField).

FIFA konfime 32 klèb yo ki pral reprezante konfederasyon yo. Men lis yo detaye:

1. Ewòp (UEFA) – 12 klèb:

Frans: Paris Saint-Germain (PSG)

Angletè: Chelsea, Manchester City

Espay: Real Madrid, Atlético Madrid

Almay: Bayern Munich, Borussia Dortmund

Itali: Inter Milan, Juventus

Pòtigal: Porto, Benfica

Otrich: Red Bull Salzburg

2. Amerik Disid (CONMEBOL) – 6 klèb:

Brezil: Palmeiras, Flamengo, Fluminense, Botafogo

Ajantin: River Plate, Boca Juniors

3. Amerik Dinò ak Karayib (CONCACAF) – 4 klèb:

Meksik: Monterrey, León, Pachuca

Etazini: Seattle Sounders, Inter Miami

4. Afrik (CAF) – 4 klèb:

Ejip: Al-Ahly

Mawòk: Wydad Casablanca

Tinizi: Espérance Tunis

Afrik Disid: Mamelodi Sundowns

5. Azi (AFC) – 4 klèb:

Arabi Sawoudit: Al-Hilal

Japon: Urawa Reds

Kore Disid: Ulsan Hyundai

Emira Arab Ini: Al Ain

6. Oseyani (OFC) – 1 klèb:

Nouvèl Zelann: Auckland City

Nouvo fòma sa ap genyen objektif pou amelyore popilarite foutbòl klèb nan tout mond lan. MetLife Stadium, ki se youn nan pi gwo estad nan mond lan, ap òganize final la, kote meyè ekip yo pral goumen pou tit prestijye sa a.

Pou premye fwa, Etazini pral òganize Koup Dimond Klèb la, aprè siksè yo nan òganizasyon lòt gwo evènman tankou Koup Dimond 1994 ak Koup Dimond FIFA 2026 (ki ap vini). Konpetisyon an pwomèt yon gwo eksitasyon pou fanatik foutbòl atravè lemond, pandan yo pral swiv si yon klèb nouvo ap pran tit la oswa si yon klèb istorik ap ranfòse dominasyon li.

Koup Dimond Klèb FIFA 2025 lan pral yon okazyon san parèy pou selebre foutbòl mondyal ak talan ekstrawòdinè nan tout konfederasyon yo. Fanatik yo ap tann avèk anpil enpasyans pou wè ki klèb k ap reyalize rèv mondyal la.