Eredivisie

Avèk yon sitiyasyon finansye ki pa bon ditou, Vitesse Arnhem sou wout pou disparèt nan foutbòl Lawoland lan.

Tout sa, se akoz dirijan klèb la pa nan pozisyon pou rive jwenn mwayen pou retire ekip la nan sa li ye a. Aprè gwoup ki responsab chanpyona Lawoland lan fin retire 18 pwen sou klèb la akoz manke lajan, antrenè Vitesse la, John van den Brom fè apèl ak tout moun ki genyen lanmou pou ekip la pou fè yon jès nan lide pou yo kapab toujou egziste.

Fas ak sitiyasyon ekonomik sa, klèb entènasyonal ayisyen an Arcus oblije reflechi ak sezon 2024-2025 lan. Kondane pou desann nan Eerste Divisie a ki se dezyèm divizyon chanpyona Lawoland lan, yo gen obligasyon pou rantre kòb anvan sa pou jwenn aksè jwe nan chanpyona D2 a.

Pou evite yon bagay konsa rive, ansyen jwè ekip la tankou Milot Rashica, Wilfried Bony, Lewis Baker, Remko Pasveer ou ankò Matt Miazga, yo lonje men bay ansyen klèb yo menm jan gen lòt moun ki fè menm jès la.

Deja echwe nan D1 Lawoland lan, Vitesse ki jwe 33èm jounen Eredivisie a jodia konnen yon viktwa (1-3) an deplasman lakay Heerenveen gras ak M Van Ginkel 23èm, 58èm sou yon penalite epi T. Buitink 90èm +2 bay 3 pwen an ak jòn e nwa yo.

Carlens Arcus ki fè pati 30 jwè Sébastien Migné rele yo te prezan e jwe tout rankont lan pou Vitesse fas Heerenveen.

KÒMANTÈ

Dènye atik yo