Lionel Messi kite PSG aprè dènye match sezon an nan wikenn ki sot pase a. Sa te fè chanpyon dimond an tit la te lib pou l siyen ak nenpòt ekip nan nenpòt chanpyona. Messi, yon jwè anpil moun konsidere kòm pi gwo jwè nan istwa foutbòl la pa t manke pretandan pou ete a, yon bagay ki pa etone nou.

Messi te jwenn yon gwo òf pou Arabi Sawoudit kote gouvènman nan peyi sa te ofri l plis pase 400 milyon dola pa ane pou l te kapab vin jwe nan Saudi Pro League (SPL) la. Òf sa te fè plizyè jou sou tab men Messi pa t aksepte l.

FC Barcelone bò kote pa yo te bezwen jwè a tounen anndan ekip la. Joan Laporta te manifeste dezi l piblikman pou sa fèt men yo pa t ka fè Messi okenn òf. Yo te menm arive mete yon plan sou pye pou yo ka pran Messi, yon plan dirijan La Liga yo te apwouve, men se te lave men siye atè akoz yo pa t gentan fè plas pou Messi te ka rantre nan lis salè yo a.

Ebyen se Inter Miami ki gen gwo lo a. Messi pral siyen yon kontra de (2) lane ak ekip la pou yon salè ki potko devwale. Messi ak papa l ki se ajan li ap debake Miami jodi a menm pou finalize tout bagay nan kontra a. Inter Miami ki te bezwen jwè a depi 2021 lè jwè a t ap kite ekip FC Barcelone nan jwenn sa yo t ap chèche a. Yo mize nan wout men y ap pote bon komisyon pou MLS la ki pral gen kalite jwè sa ki ap evolye ladan l.

Selon enfo yo madanm li enfliyanse desizyon Miami an pou timoun yo li pa t vle al viv nan peyi Arabi Sawoudit. Messi li menm fè konnen kesyon lajan Arabi Sawoudit la pa t janm entèrese l men li te vle tann FC Barcelone. Aprè ansyen ekip li a pa t ka ba li 100% garanti yo ap ka anrejistre l nan Liga a, li te oblije pran yon desizyon sou avni l.

MLS la gen yon règ ladan l, Salary Cap, ki bay limit salè ekip yo kapab genyen pou tout jwè. Si Messi refize gwo salè sa nan Arabi Sawoudit e li t ap touche anviwon 30 Milyon nan PSG, ki estrikti MLS la mete an plas pou atire jwè a?

Daprè enfòmasyon ki ap sikile, Adidas, ki se mak esponsò Messi, mak esponsò MLS la tou (tout ekip yo se Adidas ki abiye yo), ap pataje revni mayo ak Messi nan deal pou li vin jwe pou Inter Miami an. Apple tou, gras ak Apple TV+, ki se distribitè ofisyèl match MLS yo ap pataje nan revni l tout nouvo abòne yo pandan yon peryòd.

Pou fini, MLS la ofri Messi aksyon nan yon ekip alavni menmjan yo te fè sa ak David Beckham nan lane 2007 ki kounya se pwopriyetè Inter Miami.

Pandan tan sa, Miami chita an bon dènye nan klasman konferans Ès MLS la ak sèlman 15 pwen nan 16 Match. Messi ki ap vini an menm tan ak yon nouvo antrenè pral pote yon van fre pou ekip la.

KÒMANTÈ

Dènye atik yo