AKÈY UEFA Champions League

Champions League

Ademola Lookman, yon non ki sonnen anpil dènye jou sa yo

sous: GolAyiti/imaj

10 desanm 2024 Gamarck Antoine 246

Depi nan fen sezon ki sot pase a non Ademola Lookman pa sispann klewonnen nan mond foutbòl la. Pou sezon 2024-2025 lan li ap konnen youn nan pi bèl sezon nan karyè foutbòl li. Li se youn nan pilye ekip Atalanta.

22 me 2024 Ademola Lookman te briye nan final Lig Ewopa kote ekip Atalanta te afwonte Bayer Leverkusen nan. Yon ekip Bayer Leverkusen ki te parèt tou limen nan sezon ki sot pase a. Lookman pa t bere Xavi Alonso ak ekip l ap dirije a kote li te fè 3 gòl pou pèmèt ekip Itali a chanpyon 3-0. Li te fèmen sezon an an flèch.

Entènasyonal Nijeryan an kòmanse sezon 2024-2025 lan ak menm nivo li te fèmen sezon avan. Li se youn nan eleman fò ekip la. Pou gwo tès li pase nan sezon an, li tranble filè anpil nan ekip sa yo : Napoli, Milan AC, e li menm frape Real Madrid nan match 6èm jounen Lig Chanpyon jodia kote li te make dezyèm gòl ekip Atalanta a.

Pou sezon sa li deja fè 11 gòl sou koulè ekip Atalanta, 8 nan chanpyona Itali a, 3 nan Lig dè chanpyon. Li bay 5 pas desizif nan sezon an. Lookman te tounen youn nan gwo zam ekip Atalanta lè l te kraze ekip Napoli a 3-0 kote li te fè 2 gòl nan 31 minit nan match la.

Lookman Ademola konfime bèl pèfòmans li nan 6èm jounen Lig chanpyon an fas Real Madrid. Lèn konnen Vinicius, Bellingham, Rodrygo, Mbappé sou tèren epi se Nijeryan an ki fini pi bon jwè match la.