AKÈY UEFA Champions League

Champions League

Di Maria bat Messi epi ap talonnen yon rekò Cristiano nan Ligue des Champions an

sous: GolAyiti/imaj

28 novanm 2024 Steve Pierre 470

Angel Di Maria ap ekri yon lòt paj nan istwa Ligue des Champions an. Avèk yon lòt pèfòmans eksepsyonèl ayè pandan 5yèm jounen faz gwoup yo, entènasyonal Ajanten an depase Lionel Messi nan lis meyè pasè tout istwa konpetisyon an epi pwoche pi pre rekò Cristiano Ronaldo a.

Benfica te fè yon viktwa enpòtan (2-3) kay Monaco kote Di Maria t ap briye. Nan match sa a, li te bay de (2) pas gòl ki te fè diferans lan pou ekip li a. Pas sa yo pa t sèlman itil pou Benfica, men yo te pèmèt Di Maria monte nan klasman meyè pasè Ligue des Champions an ak 41 pas gòl. Sa vle di li depase Messi ki gen 40, epi li jis dèyè Cristiano Ronaldo, ki gen 42.

Anpil ekspè deja wè Di Maria kòm youn nan kandida prensipal pou kraze rekò CR7 la. Ajanten an, ki te fè istwa kòm youn nan pi gwo pasè nan jenerasyon li, gen tout chans pou egalize epi depase ansyen koyekipye li nan Real Madrid la pandan rès sezon sa.

Klasman meyè pasè tout istwa Ligue des Champions an:

1. Cristiano Ronaldo: 42 pas gòl

2. Angel Di Maria: 41 pas gòl

3. Lionel Messi: 40 pas gòl

4. Neymar: 33 pas gòl

5. Ryan Giggs: 31 pas gòl

Nan tan ki rete yo nan sezon sa a, tout je ap rete fikse sou Di Maria pou wè si li ka depase Ronaldo epi mete pwòp rekò pa l. Èske Cristiano ap toujou rete wa pasè Ligue des Champions an ? Oswa èske Di Maria pral pran plas li? Rès sezon an ap reponn kesyon sa yo.