AKÈY UEFA Champions League

Champions League

FC Barcelone al genyen Borussia Dortmund lakay yo

sous: GolAyiti/imaj

12 desanm 2024 Jameson Lamarre 757

Semèn sa se te semèn Ligue des Champions an ki te retounen. FC Barcelone te deplase ayè mèkredi a lakay Dortmund pou al jwe match ki konte pou sizyèm jounen an. Se yon match kite difisil men klèb ki sòti nan peyi a Espay la genyen klèb Alman an (3-2) pou pase dezyèm nan klasman an!

Gras ak yon double pou Ferran Torres epi yon gòl Raphinha, FC Barcelone genyen Borussia Dortmund. Malgre Serhou Guirassy a te egalize pandan de fwa pou klèb li, men jwè gineyen an pa t kapab rive reponn dènye gòl Torres la ki lakòz yon defèt pou Borussia Dortmund !

Pou premye peryòd la, se te yon match ki te parèt difisil paske chak ekip te gen moman yo men yo t ap veye do yo anmenmtan, sa ki lakòz yo te rantre nan vestyè ak yon nil (0-0).

Kèk tan prè ekip yo fin dòti nan vestyè a, nan 53èm minit, sou yon aksyon Dani Olmo te byen mennen, li te sèvi Raphinha ki te make gòl (1-0) a, jis anvan nan 60èm minit Serhou Guirassy ta pral fè gòl (1-1) an sou yon pennalite aprè yon fot Cubarsí te komèt sou Guirassy anndan kare a.

FC Barcelone te fè plizyè chanjman, pami yo Ferran Torres ki limenm ta pral make nan 75èm minit aprè yon rebon li te jwenn sou yon balon gadyen Borussia a te mal negosye e se te (2-1). Yon lòt fwa ankò Serhou Guirassy ta pral egalize (2-2) nan 78èm minit aprè yon vye sòti Iñaki Peña fè. Men sa pa t ret konsa paske nan 85èm minit, menm Ferran Torres sa te bay Barcelone gòl (3-2) kite tou klotire eskò match la.

Sa se yon lòt gwo viktwa pou FC Barcelone nan Ligue des Champions an, ki tou pase dezyèm nan do Liverpool ak 15 pwen sou 18 ki te posib. Sèl AS Monaco ki te rive mete do yo atè (2-1) nan konpetisyon an. Yo bat tout lòt ekip yo rankontre sou wout yo.

Viktwa sa fè FC Barcelone vin pami ekip ki kalifye omwen pou pwochen tou konpetisyon an. Lòt ekip ki kalifye se Liverpool. Menmsi de ekip yo ta pèdi rès match ki rete yo y ap omwen jwe baraj nan konpetisyon an!

Lamine Yamal ki te pasè pou gòl (3-2) a, se te pi bon jwè match la, selon UEFA.