AKÈY UEFA Champions League

Champions League

Kisa k fè Manchester City ap konnen yon move moman la

sous: GolAyiti/imaj

27 novanm 2024 Benswilkenson Jean 295

Manchester City ap konnen pi move moman l depi lè Guardiola te siyen kòm antrènè ekip ekip la nan lane 2016. Se premye fwa sou rèy Pèp Guardiola a yon ekip rive egalize aprè Manchester City fin mennen 3-0 nan yon match. Match yè a ak rekò sa konfime kalamite Citizens yo ap konnen nan jou sa yo.

Manchester City sou prèske yon mwa depi li pa konn gou viktwa. Pou kounya, yo sou 6 match afile san okenn viktwa kote yo pèdi 5 epi fè yon match nil, yon match nil ki prèske sinonim defèt pou yo plis ke yo fè jiska 3/4 (twaka) match la ap mennen 3-0. Yo te pèdi 3 pwen sa yo nan sèlman 15minit fas yon ekip ki 20yèm nan klasman Champions League pou sezon sa epi ki 4èm nan chanpyona lakay li nan peyi Olann ak 28pwen.

Dènye Guardiola fè yon viktwa ak City se kont ekip Southampton lan (1-0) nan dat 26 oktòb 2024 la nan kad 9èm jounen Premier League la. Depi apre dat sa, match yè a kont Feynoord se sèl grenn match nil yo reyisi fè.

Se pou premye fwa depi 1989 Manchester City pa genyen yon match yo mennen 3-0. Dènye fwa a se te kont Bournemooth nan dezyèm divizyon peyi Angletè a, yon match ki te fini 3-3.

Manchester City se premye ekip tou ki mennen 3-0 jiska 75èm minit nan yon match Champions League ki pa reyisi genyen match la.

"Mwen anvi fè tèt mwen mal" se deklarasyon Pep Guardiola apre match kont Feynoord la.

Pou rapèl City a chaje jwè enpòtan ki blese tankou Rodri ak Kovacić ki konn abitye jwe milye defansif. Yon plas ki sanble pa gen ranplasan ki gen kalite.

Pou match jodi a Guardiola te oblije pran 2 mitan tèren ofansif (Matheus Nunes ak Gündogan) pou fè jwe l, men yon chwa ki pa pote rezilta. Pliske nan lè enpòtan an yo pa t reponn prezan.

Malgre tout defèt sa yo, pi piti pousantaj balon ekip Manchester City a fè pandan 6dènye match li yo se 58%. Sa ki montre ekip la toujou pase balon men yo pa gen kolòn vètebral.