AKÈY UEFA Champions League

Champions League

Real Madrid bat Atalanta lakay li nan Lig Chanpyon an

sous: GolAyiti/imaj

10 Desanm 2024 Jameson Lamarre 715

Nan 6èm jounen Lig Chanpyon an, Real Madrid te deplase nan peyi Itali pou al jwe kont Atalanta kote yo te gen pou objektif genyen. Ebyen klèb madrilèn lan te soufri, men yo byen sòti nan match la avèk yon viktwa (3-2).

Se te yon bèl match bò kote tou de ekip yo, men nan senk premye minit yo se te ekip Atalanta a ki t ap domine match foutbòl la. Sa pa t anpeche se yo k ta pral ankese premye gòl match la nan 10èm minit, sou yon pas de Brahim Diaz pou Kylian Mbappé (1-0). Menm moman sa, ekip anfas la t ap pouse sou Real Madrid jiskaske nan 45+2’ yo te egalize aprè yon penalite yo te jwenn epi Charles De Ketelaere te byen pran longè Thibaut Courtois (1-1), ki tou file nan vestyè ansanm ak eskò sa !

Nan dezyèm mitan an, Atalanta Bergame mete pye l sou balon an kote l pa aksepte Real Madrid jwenn boul la ditou. Se menm yo menm nan ki ta pral pran de (2) gòl nan espas twa (3) minit. Gòl (2-1) an se aprè yon kado nan sifas yo a Vinicius Junior pwofite mete klèb li devan nan 56èm minit. Pou gòl (3-1) an, se yon long balon Vinicius voye bay Jude Bellingham, e misye mete yon chout pye goch dezyèm poto ki kite gadyen an san reyaksyon, jis anvan Ademola Lookman nan 65èm te redui eskò a (3-2). Malgre chanjman bò kote chak ekip yo, men se te eskò sa ki te fini match foutbòl la !

Se yon viktwa pou Real Madrid san briye, men ki enpòtan pou yo paske yo te rete sou yon defèt lakay Liverpool nan 5èm jounen an, sa ki te lakòz yo degrenngole nan 24èm plas klasman an. Aprè viktwa yo nan 6èm jounen an, yo monte nan 18èm plas klasman an avèk nèf (9) pwen.

Jude Bellingham kontinye ap make gòl pou Real Madrid. Mesye a nan sèt (7) dènye match li ak Real Madrid yo se sis (6) gòl li make. Nou anvi wè "BELLIGOL" sezon pase a !

Vinicius Junior ki limenm te blese kote l pa t jwe match anfas Liverpool la te tounen timidman kont Atalanta kote l rive make yon gòl ak yon pas gòl, sa ki fè pou sezon sa li jwe 19 match, ladan yo li make 13 gòl e li bay 9 pas gòl !

Ademola Lookman se pi bon jwè match foutbòl la, daprè chwa UEFA !